اسلام آباد (انٹرنیشنل کارسپونڈنٹ فائزہ یونس سے)
سال 2025 اسلام آباد پولیس کے لیے تاریخی ثابت ہوا۔ انسپکٹر جنرل (آئی جی) اسلام آباد سید علی ناصر رضوی کی زیر قیادت دارالحکومت میں قانون نافذ کرنے والے ادارے نے ایک کے بعد ایک نمایاں کامیابیاں حاصل کیں، جنہوں نے شہریوں کے تحفظ کو یقینی بنانے اور مجرموں کی بیخ کنی میں بنیادی کردار ادا کیا۔
ترجمان اسلام آباد پولیس کے مطابق، “نشہ اب نہیں” مہم کے تحت منشیات فروشوں کے خلاف بھرپور کارروائیاں عمل میں لائی گئیں۔ پولیس نے درجنوں منشیات فروشوں کو گرفتار کیا، جبکہ متعدد غیر قانونی شراب بنانے والی فیکٹریاں بند کر کے سینکڑوں بوتلیں شراب اور دیگر نشہ آور اشیاء برآمد کی گئیں۔
مزید براں، قتل، اغواء، ڈکیتی اور چوری جیسے سنگین مقدمات میں مطلوب خطرناک ملزمان کی گرفتاری بھی پولیس کی بڑی کامیابیوں میں شامل رہی۔ کئی پرانے کیسز میں بھی جدید ٹیکنالوجی اور تفتیشی مہارت کی بدولت نئی پیش رفت ہوئی۔
اسلام آباد پولیس نے سیف سٹی پروجیکٹ کے تحت جدید کیمروں اور ڈیجیٹل نگرانی کے نظام کو مزید مؤثر بنایا، جس کے باعث نہ صرف جرائم کی شرح میں کمی آئی بلکہ عوامی اعتماد میں بھی اضافہ ہوا۔
آئی جی اسلام آباد سید علی ناصر رضوی کا کہنا ہے کہ پولیس فورس کو عوام دوست، جدید اور جوابدہ بنانے کا مشن جاری رہے گا، اور قانون کی حکمرانی ہر صورت میں یقینی بنائی جائے گی۔
