زاہدان، ایران
شمال مشرقی ایران کے حساس صوبے سیستان بلوچستان کے شہر زاہدان میں دہشت گردوں نے ایک عدالتی کمپاؤنڈ پر حملہ کر دیا، جس کے نتیجے میں 5 افراد جاں بحق اور 13 زخمی ہو گئے۔ ایرانی سیکیورٹی فورسز کی جوابی کارروائی میں 3 حملہ آور بھی مارے گئے۔
ایرانی اور بین الاقوامی میڈیا رپورٹس کے مطابق، مسلح افراد عدالتی احاطے میں داخل ہوئے اور ججوں کے کمروں میں گھس کر فائرنگ شروع کر دی۔ حملہ انتہائی منظم اور منصوبہ بندی کے تحت کیا گیا، جس کا مقصد بظاہر عدالتی نظام کو نشانہ بنانا تھا۔
واقعے کے فوراً بعد ایرانی سیکیورٹی فورسز نے جوڈیشل کمپاؤنڈ کو گھیرے میں لے لیا اور شدید فائرنگ کے تبادلے کے بعد تینوں حملہ آوروں کو ہلاک کر دیا۔
ایرانی حکام کے مطابق، شدت پسند تنظیم "جیش العدل” نے مبینہ طور پر اس دہشت گرد حملے کی ذمہ داری قبول کر لی ہے۔ یہ تنظیم اس سے قبل بھی ایران میں سیکیورٹی فورسز اور سرکاری تنصیبات پر حملوں میں ملوث رہی ہے۔
زخمیوں کو قریبی اسپتالوں میں منتقل کر دیا گیا ہے، جہاں بعض کی حالت تشویشناک بتائی جا رہی ہے۔ سیکیورٹی فورسز نے علاقے میں سرچ آپریشن شروع کر دیا ہے جبکہ عدالتی سرگرمیاں معطل کر دی گئی ہیں۔
تجزیہ کاروں کا کہنا ہے کہ یہ حملہ نہ صرف ایرانی عدالتی نظام بلکہ ریاست کی مجموعی داخلی سلامتی کے لیے ایک سنجیدہ چیلنج ہے، اور اس کے خطے میں وسیع تر سیکیورٹی اثرات مرتب ہو سکتے ہیں۔
