اسلام آباد:
یونائیٹڈ اسٹیٹس سینٹرل کمانڈ (سینٹکام) کے کمانڈر جنرل مائیکل ایرک کوریلا کو پاکستان اور امریکا کے درمیان عسکری تعاون کے فروغ میں مثالی خدمات پر نشانِ امتیاز (ملٹری) سے نوازا گیا۔
آئی ایس پی آر کے مطابق، صدرِ پاکستان آصف علی زرداری نے ایوانِ صدر اسلام آباد میں منعقدہ باوقار تقریب میں جنرل کوریلا کو یہ اعزاز عطا کیا۔ تقریب کے موقع پر انہیں تینوں مسلح افواج کے چاق و چوبند دستے نے گارڈ آف آنر بھی پیش کیا۔بیان میں کہا گیا کہ جنرل کوریلا نے پاکستان اور امریکا کے درمیان انسدادِ دہشت گردی، دفاعی اشتراک اور علاقائی سلامتی میں کلیدی کردار ادا کیا۔ ان کی قیادت اور وابستگی نے دونوں ممالک کے درمیان اسٹریٹجک دفاعی روابط کو مضبوط بنانے میں اہم کردار ادا کیا۔
آئی ایس پی آر کا کہنا ہے کہ جنرل کوریلا کی خدمات پاکستان کی طرف سے گہرے احترام اور مشترکہ سلامتی کے عزم کا اعتراف ہیں۔ یہ اعزاز پاکستان اور امریکا کے درمیان بڑھتے ہوئے عسکری تعلقات اور طویل المدتی تعاون کی توثیق کرتا ہے۔
جنرل کوریلا نے اپنے حالیہ دورہ پاکستان میں صدرِ پاکستان، آرمی چیف فیلڈ مارشل سید عاصم منیر سمیت اعلیٰ سیاسی و عسکری قیادت سے ملاقاتیں کیں۔ ان ملاقاتوں میں علاقائی سیکیورٹی، انسداد دہشت گردی اور عالمی خطرات کے خلاف مشترکہ حکمتِ عملی پر تبادلہ خیال کیا گیا۔
