برطانیہ میں ایئر ٹریفک کنٹرول کے نظام میں فنی خرابی کے باعث پیدا ہونے والے خلل کے ایک دن بعد، لندن کے ہیتھرو ایئرپورٹ پر جمعرات کو کم از کم 16 پروازیں منسوخ کر دی گئیں۔
نیشنل ایئر ٹریفک سروسز (NATS) — جو برطانیہ اور شمالی بحرِ اوقیانوس کے مشرقی حصے میں فضائی کنٹرول کی ذمہ داری سنبھالتی ہے — نے بتایا کہ تکنیکی بحران کے بعد اس کا نظام بیک اپ پر منتقل کر دیا گیا ہے، اور اب معمول کی بحالی کی طرف واپس آ رہا ہے۔تاہم، بدھ کے روز ہونے والی خرابی کے اثرات تاحال جاری ہیں۔ ایوی ایشن تجزیاتی ادارے سیریم (Cirium) کے مطابق، نظام کی بندش سے گیٹ وک، ایڈنبرا اور دیگر بڑے ہوائی اڈوں پر بھی اثرات پڑے، جہاں بدھ کو 122 پروازیں منسوخ کی گئیں۔وزیر برائے رسل و رسائل ہیڈی الیگزینڈر نے اعلان کیا ہے کہ وہ NATS کے چیف ایگزیکٹیو مارٹن رولف سے ملاقات کریں گی تاکہ اس بحران کی وجوہات اور مستقبل میں ایسے واقعات کی روک تھام پر بات چیت کی جا سکے۔
ریان ایئر کے چیف آپریٹنگ آفیسر نیل میک موہن نے اس ناکامی کو شدید تنقید کا نشانہ بناتے ہوئے مارٹن رولف سے مستعفی ہونے کا مطالبہ کر دیا ہے۔ ان کا کہنا تھا کہ اگست 2023 میں بھی اسی نوعیت کی تکنیکی خرابی کے بعد کوئی سبق نہیں سیکھا گیا۔ہیتھرو ایئرپورٹ کی ویب سائٹ کے مطابق، جمعرات کو منسوخ ہونے والی پروازوں میں برسلز اور ٹورنٹو جانے والی، اور نیویارک و برلن سے آنے والی پروازیں شامل ہیں۔
واضح رہے کہ مارچ میں بھی ہیتھرو ایئرپورٹ کے ایک پاور سب اسٹیشن میں آگ لگنے سے ہزاروں مسافر متاثر ہوئے تھے۔
