لندن –(مانیٹرنگ ڈیسک وائس آف جرمنی )
برطانیہ کے دفترِ شماریات (ONS) کی جانب سے جاری کردہ تازہ اعداد و شمار کے مطابق، "محمد” مسلسل دوسرے سال انگلینڈ اور ویلز میں سب سے زیادہ رکھا جانے والا لڑکوں کا نام بن گیا ہے۔
2024 میں پیدا ہونے والے نومولود لڑکوں میں "محمد” سب سے زیادہ رکھا گیا، جب کہ 2023 میں بھی یہی نام پہلے نمبر پر رہا تھا۔ "محمد” 2016 سے برطانیہ میں لڑکوں کے مقبول ترین ناموں کی فہرست میں مسلسل شامل ہے—2022 میں دوسرے اور 2021 میں پانچویں نمبر پر تھا۔
رپورٹ میں اس رجحان کو مسلمانوں کی بڑھتی ہوئی آبادی اور اسلامی ثقافتی اثرات سے جوڑا گیا ہے، جن میں والدین اپنے بچوں کے لیے مذہبی اور روایتی نام پسند کرتے ہیں۔
دیگر مقبول ناموں میں "نوح” دوسرے اور "اولیور” تیسرے نمبر پر رہے، جبکہ لڑکیوں کے لیے "اولیویا” اور "امیلیا” مسلسل تیسرے سال بھی مقبول ترین ناموں میں شامل رہیں۔
دوسری جانب، شاہی خاندان سے منسوب ناموں کی مقبولیت میں نمایاں کمی دیکھی گئی ہے—”جارج” چھٹے اور "ولیم” اب 27 ویں نمبر پر آ چکا ہے۔
