پاکستان مسلم لیگ (ن) کے صدر محمد نواز شریف اور وزیراعلیٰ پنجاب مریم نواز شریف سے متحدہ عرب امارات کے پاکستان میں سفیر حماد عبید ابراہیم سالم الزعابی نے ملاقات کی، جس میں دوطرفہ تعلقات، اقتصادی شراکت داری، اور مستقبل کے تعاون پر تفصیلی تبادلہ خیال کیا گیا۔
ملاقات کے دوران نواز شریف اور مریم نواز شریف نے سفیر کا پرتپاک استقبال کرتے ہوئے یو اے ای کی قیادت اور عوام کے لیے نیک تمناؤں اور خیرسگالی کا پیغام دیا۔ فریقین نے پاکستان اور یو اے ای کے تعلقات کو نئی بلندیوں تک لے جانے کے عزم کا اظہار کیا۔نواز شریف نے کہا کہ "پاکستان اور یو اے ای کا رشتہ محض سفارتی نہیں بلکہ دلوں میں بسا بندھن ہے، جو وقت اور حالات کی آزمائشوں میں ہمیشہ سرخرو رہا ہے۔”
انہوں نے صدر یو اے ای شیخ محمد بن زاید النہیان کی وژنری قیادت کو خراج تحسین پیش کرتے ہوئے یو اے ای کی سائنسی ترقی، ماحول دوستی اور جدید وژن کو سراہا۔وزیراعلیٰ مریم نواز شریف نے کہا کہ تعلیم، تحقیق، ماحولیات، اور پائیدار ترقی کے میدان میں دونوں ممالک کے درمیان تعاون کو مزید فروغ دیا جائے گا۔ انہوں نے سرکاری و سفارتی پاسپورٹ ہولڈرز کے لیے ویزا فری انٹری کی سہولت کو سراہتے ہوئے کہا کہ "یہ اقدام دوطرفہ اعتماد اور تعلقات کی مضبوطی کا مظہر ہے۔”مریم نواز نے یو اے ای کے سرمایہ کاروں، اداروں اور کاروباری برادری کو پنجاب میں سرمایہ کاری کی دعوت دیتے ہوئے کہا کہ:
"پنجاب، بزنس فرینڈلی انوائرمنٹ کے ساتھ سرمایہ کاری کے لیے بہترین انتخاب بن چکا ہے، جہاں تعلیم، صحت، انفراسٹرکچر اور قابلِ تجدید توانائی کے شعبوں کو جدت کی راہ پر گامزن کر دیا گیا ہے۔”ملاقات میں دوطرفہ تجارتی حجم میں اضافے کو بھی خوش آئند قرار دیا گیا۔
