ترکیہ کے مغربی صوبہ بالیک ایسیر میں 6.1 شدت کا زلزلہ آیا، جس کے نتیجے میں 10 سے زائد عمارتیں زمین بوس ہو گئیں۔ ترک میڈیا کے مطابق زلزلے کے بعد 4.6 اور 4.1 شدت کے آفٹر شاکس بھی ریکارڈ کیے گئے۔
جرمن ریسرچ سینٹر فار جیو سائنسز کے مطابق زلزلے کی گہرائی 10 کلومیٹر تھی۔ ترک ڈیزاسٹر منیجمنٹ اتھارٹی نے بتایا کہ زلزلہ مقامی وقت کے مطابق شام 7 بج کر 53 منٹ پر آیا، اور اس کے جھٹکے استنبول، برصا سمیت 11 صوبوں میں محسوس کیے گئے۔ مرکز ضلع سندرگی بتایا جا رہا ہے۔
ابتدائی طور پر کسی جانی نقصان کی اطلاع نہیں ملی، تاہم عمارتوں کے منہدم ہونے اور متاثرہ علاقوں میں نقصانات کی اطلاعات موصول ہو رہی ہیں۔ ترک صدر رجب طیب اردوان نے متاثرہ شہریوں سے اظہارِ ہمدردی کرتے ہوئے کہا کہ وہ امدادی سرگرمیوں کی خود نگرانی کر رہے ہیں۔
