اسلام آباد میں سی ڈی اے کے تحت کمرشل پلاٹس کی شفاف نیلامی جاری – سرمایہ کاروں کی بھرپور دلچسپی

اسلام آباد (انٹرنیشنل کارسپونڈنٹ فائزہ یونس سے )
وفاقی دارالحکومت اسلام آباد میں کمرشل پلاٹس اور بلیو ایریا کے پارکنگ پلازہ کی دکانوں کی شفاف نیلامی کا عمل زور و شور سے جاری ہے۔ اس نیلام عام کا انعقاد کیپیٹل ڈیولپمنٹ اتھارٹی (سی ڈی اے) کے زیرِ انتظام 15 سے 17 جولائی تک جناح کنونشن سینٹر میں کیا گیا ہے۔
نیلامی کی نگرانی خود چیئرمین سی ڈی اے اور چیف کمشنر اسلام آباد محمد علی رندھاوا کر رہے ہیں، جب کہ اس عمل کی شفافیت کو یقینی بنانے کے لیے ممبر اسٹیٹ طلعت محمود، ممبر فنانس طاہر نعیم اور ممبر پلاننگ ڈاکٹر خالد حفیظ بھی نیلامی کی براہِ راست نگرانی کر رہے ہیں۔
تین روزہ نیلام عام میں مختلف کیٹیگریز کے 46 کمرشل پلاٹس اور دکانیں اوپن آکشن کے ذریعے سرمایہ کاروں کے لیے پیش کی گئی ہیں۔ سی ڈی اے کی جانب سے اس نیلامی میں مکمل شفافیت اور جدید طریقہ کار کو اپنایا گیا ہے۔
نیلامی میں بلیو ایریا سمیت دیگر اہم تجارتی مراکز کے پلاٹس شامل کیے گئے ہیں، جبکہ سرمایہ کاروں کی جانب سے مختلف پلاٹس میں خاصی دلچسپی دیکھنے میں آئی ہے۔ نیلام عام کے ساتھ ساتھ سی ڈی اے کی جانب سے انویسٹمنٹ ایکسپو کا بھی انعقاد کیا گیا ہے تاکہ سرمایہ کاروں اور بزنس کمیونٹی کو مکمل آگاہی اور سہولیات فراہم کی جا سکیں۔
ایکسپو میں انوائرمنٹ ونگ، ایم سی آئی، اسپورٹس اینڈ کلچر ڈائریکٹوریٹ سمیت مختلف اداروں کے انفارمیشن بوتھ قائم کیے گئے ہیں۔
چیئرمین سی ڈی اے محمد علی رندھاوا نے اس موقع پر کہا کہ "سرمایہ کاروں کی سہولت کے لیے ہر ممکن اقدامات کیے جا رہے ہیں۔ نیلامی سے حاصل ہونے والی آمدنی اسلام آباد شہر کی تعمیر و ترقی، سیکٹر ڈویلپمنٹ، روڈ انفراسٹرکچر اور بیوٹیفکیشن پر خرچ کی جائے گی تاکہ اسلام آباد کو ایک ماڈل اور مثالی شہر بنایا جا سکے۔”
سی ڈی اے کی سرمایہ کار دوست پالیسی کے تحت یکمشت ادائیگی پر 5 فیصد رعایت دی گئی ہے، جبکہ امریکی ڈالر میں ادائیگی کی صورت میں اضافی 5 فیصد رعایت کی سہولت بھی فراہم کی گئی ہے۔ ہر قدم پر سرمایہ کاروں کی معاونت کے لیے فیسلیٹیشن ٹیم بھی نیلامی ہال میں موجود ہے۔