انڈونیشیا کے وزیردفاع نے ایک اعلیٰ سطحی وفد کے ہمراہ جنرل ہیڈکوارٹرز (جی ایچ کیو) راولپنڈی کا دورہ کیا، جہاں انہوں نے پاک فوج کے سربراہ فیلڈ مارشل عاصم منیر سے ملاقات کی۔ اس اعلیٰ سطحی وفد میں انڈونیشین مسلح افواج اور انٹیلیجنس ایجنسیوں کے نمائندے بھی شامل تھے۔
آئی ایس پی آر کے مطابق ملاقات کے دوران دونوں ممالک کے مابین دوطرفہ دفاعی تعاون، عسکری روابط کو مزید مضبوط بنانے اور علاقائی سلامتی کی صورتحال پر تفصیلی تبادلہ خیال کیا گیا۔ اس موقع پر پاکستان اور انڈونیشیا کے درمیان دیرینہ دوستی اور اسٹریٹجک شراکت داری کو مزید وسعت دینے پر زور دیا گیا۔آرمی چیف فیلڈ مارشل عاصم منیر نے خطے میں پائیدار امن و استحکام کے لیے دونوں ممالک کے درمیان باہمی تعاون کی اہمیت پر روشنی ڈالی۔ انڈونیشیا کے وزیردفاع نے دہشت گردی کے خلاف جنگ میں پاک فوج کے کردار کو سراہتے ہوئے پاکستان کے ساتھ دفاعی تعاون کو مزید فروغ دینے کے عزم کا اعادہ کیا۔
آئی ایس پی آر کا کہنا ہے کہ دونوں فریقین نے مستقبل میں مشترکہ تربیتی مشقوں اور دفاعی تعاون بڑھانے پر بھی آمادگی ظاہر کی
