پشاور (سیاسی نمائندہ)
مسلم لیگ (ن) نے خیبر پختونخوا میں سینیٹ انتخابات کے لیے اپنے امیدوار کا اعلان کر دیا ہے۔ پارٹی کے صوبائی صدر انجینئر امیر مقام کے صاحبزادے نیاز احمد کو مسلم لیگ (ن) کی جانب سے سینیٹ کا ٹکٹ جاری کر دیا گیا ہے۔
پارٹی ذرائع کے مطابق، اعلیٰ قیادت نے مشاورت کے بعد نیاز احمد کے نام پر اتفاق کیا۔ انہیں نہ صرف پارٹی کا بھرپور اعتماد حاصل ہے بلکہ خیبر پختونخوا میں پارٹی کو منظم اور فعال بنانے کے لیے ان کی سیاسی اور سماجی خدمات کو بھی مدنظر رکھا گیا ہے۔
نیاز احمد پہلی بار سینیٹ کے انتخاب میں حصہ لیں گے، تاہم ان کا سیاسی پس منظر اور خاندان کی خدمات پارٹی کے لیے ایک مضبوط سرمایہ تصور کی جاتی ہیں۔ ان کے انتخاب کو مسلم لیگ (ن) کی نوجوان قیادت کے فروغ کی ایک اہم کڑی سمجھا جا رہا ہے۔
اس فیصلے کے بعد صوبے میں پارٹی کارکنان میں جوش و خروش کی فضا پیدا ہو گئی ہے، جبکہ سیاسی مبصرین کے مطابق یہ اقدام خیبر پختونخوا میں مسلم لیگ (ن) کی پوزیشن مستحکم کرنے کی کوشش کا حصہ ہے۔
واضح رہے کہ ملک بھر میں آئندہ سینیٹ انتخابات کے سلسلے میں سیاسی سرگرمیاں عروج پر ہیں اور تمام جماعتیں اپنے امیدواروں کے انتخاب میں مصروف ہیں۔
