پاکستان جلد دوبارہ دنیا کی 24 ویں معیشت بن کر ابھرے گا. اسحاق ڈار

پاکستان سعودی عرب کی خودمختاری،علاقائی سالمیت کیلئے پرعزم ہے‘ اقتصادی بحالی کے ایجنڈے کے مثبت نتائج برآمد ہوںگے. وزیرخارجہ کاپاک سعودی عرب بزنس فورم سے خطاب
اسلام آبادوزیر خارجہ سینیٹر اسحاق ڈار نے کہا ہے کہ پاکستان کی معیشت ترقی کی راہ پر گامزن ہے،ملک جلد دوبارہ دنیا کی 24 ویں معیشت بن کر ابھرے گا اسلام آباد میں پاک سعودی عرب بزنس فورم سے خطاب کرتے ہوئے اسحاق ڈار کا کہنا تھا کہ سعودی وزیر سرمایہ کاری، وفد اور شریک پاکستانی حکام کو خوش آمدید کہتا ہوں، سعودی عرب کے مہمانوں کا یہاں آنا ہمارے لئے اعزاز کی بات ہے.انہوں نے کہا کہ پاکستان اور سعودی عرب کے درمیان برادرانہ تعلقات ہیں، پاکستان دوطرفہ تعلقات کو مضبوط بنانے کیلئے سعودی وفد کا پرتپاک خیر مقدم کرتا ہے، پاکستان سعودی عرب کے ساتھ اپنے تاریخی تعلقات کو بہت اہمیت دیتا ہے، سعودی عرب نے مشکل معاشی حالات میں پاکستان کی بہت مدد کی. ان کا کہنا تھا کہ پاک سعودی عرب اسٹریٹجک شراکت داری نئے دور میں داخل ہوگئی ہے، پاکستان کی معیشت پائیدار ترقی کی راہ پر گامزن ہے، پاکستان میں غیر ملکی سرمایہ کاروں کیلئے سازگار ماحول موجود ہے انہوں نے کہا پاکستان سعودی عرب کی خودمختاری،علاقائی سالمیت کیلئے پرعزم ہے، اقتصادی بحالی کے ایجنڈے کے مثبت نتائج برآمد ہوں گے.وزیرخارجہ نے کہا کہ کوئی شک نہیں کہ پاکستان کو چیلنجز درپیش ہیں، پاکستان 2017 میں 24ویں بڑی معیشت تھا، پاکستان معاشی لحاظ سے مضبوط ملک تھا، پاکستان آئندہ چند سالوں میں جی 20 ممالک میں شامل ہونے والا تھا اسحاق ڈار کا کہنا تھا کہ شہبازشریف کو جب 2022 میں وزارت عظمی ملی تو ملک کو دوبارہ معاشی ترقی کی راہ پر گامزن کیا، وہ وقت دور نہیں جب پاکستان دوبارہ جی 20 ممالک میں شامل ہوگا، روپے کی قدر میں استحکام، معاشی اشاریے بہتری کی جانب گامزن ہیں.وزیر خارجہ نے کہا کہ وزیراعظم شہبازشریف کی حکومت معاشی بحالی کیلئے کوششیں کر رہی ہے، مہنگائی کم ہوئی ہے، فارن ریزرو میں اضافہ ہوا ہے، بین الاقوامی سطح پر پاکستان کی معاشی بہتری کا اعتراف کیا جارہا ہے، پاکستان میں غیر ملکی سرمایہ کاروں کو محفوظ ماحول فراہم کیا جا رہا ہے‘ پاکستان سعودی عرب کو کان کنی کے شعبے میں سرمایہ کاری کی دعوت دیتا ہے، پاکستان میں آئی ٹی کا شعبہ عالمی سرمایہ کاروں کو راغب کر رہا ہے، آئی ٹی، مائنز اینڈ منرلز، زراعت اور فوڈ سکیورٹی پر خصوصی توجہ دی جا رہی ہے.وزیر خارجہ نے کہا کہ زراعت، قابل تجدید توانائی کے شعبے سعودی سرمایہ کاری کیلئے کھلے ہیں، پاکستان کی زرمبالہ کی مد میں سعودی عرب نے قابل ذکر مدد کی، ہماری ترجیح میکرواکنامک استحکام ہے، وزیراعظم شہبازشریف کی توجہ صرف معیشت پر ہے انہوں نے کہا کہ قابل تجدید سرمایہ کار کے منصوبے سعودی سرمایہ کاروں کے لیے کھلے ہیں، پاکستان آئی ٹی کا شعبہ عالمی سرمایہ کاروں کو راغب کر رہا ہے انہوں نے کہا کہ پاکستان دو طرفہ تعلقات کو مضبوط بنانے کے لیے سعودی عرب وفد کا خیر مقدم کرتا ہے.