پنجاب بھر میں گرجا گھروں میں عباداتی تقاریب، سیکیورٹی ہائی الرٹ پر — آئی جی پنجاب کی سخت ہدایات

لاہور: پنجاب بھر بشمول لاہور کے تمام گرجا گھروں میں مسیحی برادری کی عباداتی دعائیہ تقریبات کے موقع پر سیکیورٹی کے غیر معمولی انتظامات کیے گئے ہیں۔ آئی جی پنجاب ڈاکٹر عثمان انور نے تمام آر پی اوز اور ڈی پی اوز کو گرجا گھروں کی سیکیورٹی مزید سخت کرنے کی ہدایات جاری کی ہیں۔

آئی جی پنجاب کا کہنا ہے کہ سپروائزری افسران خود گرجا گھروں اور دیگر اہم مقامات کے سیکیورٹی انتظامات کا جائزہ لیں۔ حساس گرجا گھروں پر پولیس کی اضافی نفری اور سنائپرز تعینات کیے جائیں۔

ڈاکٹر عثمان انور نے کہا کہ ڈولفن اسکواڈ، پی آر یو اور ایلیٹ فورسز گرجا گھروں کے گرد مؤثر پٹرولنگ جاری رکھیں۔ تمام تعینات پولیس افسران اور اہلکاروں کو ہائی الرٹ رہنے اور شرپسند عناصر پر کڑی نظر رکھنے کی ہدایت کی گئی ہے۔

گرجا گھروں، مسیحی آبادیوں اور دیگر حساس مقامات پر سرچ اینڈ سویپ آپریشنز بھی جاری رکھنے کا حکم دیا گیا ہے۔

آخر میں آئی جی پنجاب نے علما کرام، مسیحی کمیونٹی اور ضلعی امن کمیٹیوں کے ارکان سے بین المذاہب ہم آہنگی کے فروغ میں بھرپور کردار ادا کرنے کی اپیل کی ہے۔