پنجاب میں ڈینگی کے خلاف ہنگامی اقدامات، کابینہ کمیٹی برائے متعدی امراض کا آٹھواں اجلاس منعقد

لاہور (انٹرنیشنل کارسپونڈنٹ پنجاب ڈاکٹر انسب علی سے)
صوبائی وزرائے صحت خواجہ سلمان رفیق اور خواجہ عمران نذیر کی زیر صدارت محکمہ صحت و آبادی میں کابینہ کمیٹی برائے متعدی امراض (بشمول ڈینگی و ڈیزاسٹر مینجمنٹ) کا آٹھواں اجلاس منعقد ہوا۔ اجلاس میں وڈیو لنک کے ذریعے تمام ڈویژنل کمشنرز، ڈپٹی کمشنرز، چیف ایگزیکٹو آفیسرز، پروفیسر وسیم اکرم سمیت دیگر طبی ماہرین نے شرکت کی۔

اجلاس میں صوبہ بھر میں ڈینگی کی حالیہ صورتحال کا تفصیلی جائزہ لیا گیا اور انسدادِ ڈینگی کے لیے جاری اقدامات پر تبادلہ خیال کیا گیا۔ وزیر صحت خواجہ عمران نذیر نے ہدایت کی کہ حالیہ بارشوں کے بعد ڈینگی کی افزائش کے امکانات کو روکنے کے لیے ہنگامی بنیادوں پر کارروائیاں تیز کی جائیں۔

خواجہ سلمان رفیق اور خواجہ عمران نذیر نے محکمہ پاپولیشن ویلفیئر کے کلینکس کا عملہ ہائی رسک علاقوں میں انسدادِ ڈینگی ٹیموں کو فراہم کرنے کی ہدایت جاری کی۔ خواجہ سلمان رفیق نے کہا کہ وزیر اعلیٰ پنجاب مریم نواز شریف کی خصوصی ہدایات پر صوبہ بھر میں ڈینگی کی صورتحال کو مسلسل مانیٹر کیا جا رہا ہے، اور اس سیزن میں گزشتہ سال کی نسبت کہیں زیادہ محنت درکار ہے۔

انہوں نے کہا کہ تمام متعلقہ محکمے بشمول ہاؤسنگ سوسائٹیز، کنسٹرکشن سائٹس، کباڑ خانے، اور قبرستانوں میں سرویلنس کو یقینی بنائیں۔ کمشنرز اور ڈپٹی کمشنرز انسدادِ ڈینگی کارروائیوں کی خود نگرانی کریں اور فیلڈ سٹاف کی 100 فیصد حاضری ہر صورت یقینی بنائی جائے۔

وزراء نے واضح کیا کہ ڈینگی سیزن میں کسی بھی محکمے کی جانب سے غفلت ناقابل برداشت ہوگی اور لاجسٹک سہولیات ترجیحی بنیادوں پر فراہم کی جائیں گی۔ ہائی رسک اضلاع پر خصوصی توجہ دی جا رہی ہے، اور جیو ٹیگنگ، ایچ آر، اور ڈیش بورڈ سے متعلق مسائل فوری حل کرنے کی ہدایات جاری کی گئیں۔

وزیر اعلیٰ پنجاب مریم نواز شریف خود انسداد ڈینگی اقدامات کی مانیٹرنگ کر رہی ہیں اور تمام اداروں کو ہدایت کی گئی ہے کہ وہ مربوط حکمت عملی کے تحت بروقت اقدامات کو یقینی بنائیں تاکہ شہریوں کو اس خطرناک وائرس سے محفوظ رکھا جا سکے۔