لاہور (انٹرنیشنل کارسپونڈنٹ پنجاب فرزانہ چوہدری سے) — اسپیکر قومی اسمبلی سردار ایاز صادق نے کہا ہے کہ ہمارے سیاسی مخالفین مکافاتِ عمل کا شکار ہو چکے ہیں، جنہوں نے ملک کو تباہی کی طرف دھکیلا، آج اُن کا کوئی نام نہیں لیتا۔
یہ بات انہوں نے لاہور کے علاقے لکھو ڈیر میں ترقیاتی سکیموں کے افتتاح کے موقع پر میڈیا سے گفتگو کرتے ہوئے کہی۔ ایاز صادق کا کہنا تھا کہ نواز شریف کی حکومت کو سازش کے تحت ختم کیا گیا، اور ان کی حکومت کے خاتمے کے بعد ترقی کا پہیہ رک گیا۔ "2017 سے 2023 تک ملک آگے جانے کے بجائے پیچھے کی طرف گیا، وہ چیف جسٹس جو فرعون بن کر بیٹھا تھا، آج اُس کا بھی کوئی ذکر نہیں کرتا”، انہوں نے کہا۔
اسپیکر قومی اسمبلی نے مزید کہا کہ وزیراعظم شہباز شریف دن رات ملک کی بہتری کے لیے کام کر رہے ہیں۔ مخالفین کو تنقید کا نشانہ بناتے ہوئے انہوں نے کہا کہ وہی لوگ جو 2018 میں بیگم کلثوم نواز کے خلاف غیر اخلاقی گفتگو کرتے تھے، آج خود تاریخ کا شکار ہو چکے ہیں۔
ایاز صادق نے تحریک انصاف کی سابقہ حکومت پر شدید تنقید کرتے ہوئے کہا کہ انہوں نے آئی ایم ایف سے کیے گئے وعدوں سے انحراف کیا اور معیشت کو ناقابلِ تلافی نقصان پہنچایا۔ "ہماری قیادت نے بروقت اقدامات کرتے ہوئے ملک کو دیوالیہ ہونے سے بچایا، اور موجودہ الیکشن کے بعد پاکستان ایک بار پھر ترقی کی راہ پر گامزن ہے”، انہوں نے دعویٰ کیا۔
بین الاقوامی امور پر تبصرہ کرتے ہوئے ایاز صادق نے کہا کہ بھارت نے پہلگام واقعے کے بعد پاکستان پر بے بنیاد الزامات لگائے اور جنگ چھیڑنے کی کوشش کی، جس کا ہماری مسلح افواج نے منہ توڑ جواب دیا۔
