اسلام آباد (محمد سلیم سے )
وفاقی وزیر اطلاعات و نشریات عطاء اللہ تارڑ نے راولپنڈی اسلام آباد یونین آف جرنلسٹس (آر آئی یو جے) کے صدر طارق علی ورک کے ساتھ تھانہ نیو ٹاؤن میں پیش آنے والے افسوسناک واقعے پر شدید تشویش کا اظہار کیا ہے۔ انہوں نے کہا کہ صحافیوں کے وقار، آزادی اور پیشہ ورانہ تحفظ کو ہر سطح پر یقینی بنایا جائے گا۔
یہ بات انہوں نے گزشتہ روز پی ایف یو جے، آر آئی یو جے، نیشنل پریس کلب اور پارلیمانی رپورٹرز ایسوسی ایشن کے نمائندہ وفد سے ملاقات کے دوران کہی۔ ملاقات میں صدر پی ایف یو جے افضل بٹ، صدر نیشنل پریس کلب اظہر جتوئی، سیکرٹری نیئر علی، صدر پارلیمانی رپورٹرز ایسوسی ایشن عثمان خان، سیکرٹری نوید اکبر، سینیئر جوائنٹ سیکرٹری آر آئی یو جے گلزار خان، رکن ایگزیکٹو غفران چشتی، عامر بٹ، مدثر چوہدری، پی آئی او مبشر حسن اور دیگر شریک تھے۔
ملاقات کے دوران صدر آر آئی یو جے طارق ورک نے تھانہ نیو ٹاؤن میں پیش آئے واقعے کی تفصیلات سے وفاقی وزیر کو آگاہ کیا۔ وفد نے راولپنڈی پولیس اور بالخصوص سی پی او خالد ہمدانی کے حوالے سے اپنے تحفظات کا دوٹوک اظہار کیا۔
عطاء اللہ تارڑ نے وفد کی گفتگو تحمل سے سنی اور آئی جی پنجاب سے بھی فوری رابطہ کیا۔ انہوں نے یقین دلایا کہ صحافیوں کو ان کے فرائض کی ادائیگی کے دوران ہر ممکن تعاون اور تحفظ فراہم کیا جائے گا۔ ان کا کہنا تھا کہ حکومت آزاد صحافت کو معاشرتی بہتری کا ستون سمجھتی ہے اور اس کے دفاع کے لیے پرعزم ہے۔
