پاکستان اسلام آباد (بیورو رپورٹ محمد سلیم سے ) — ایران کے صدر ڈاکٹر مسعود پزشکیان کے اعزاز میں وزیراعظم ہاؤس اسلام آباد میں ایک پروقار اور باضابطہ استقبالیہ تقریب منعقد کی گئی۔
وزیراعظم پاکستان محمد شہباز شریف نے معزز مہمان کا پرتپاک استقبال کیا۔ اس موقع پر دونوں ممالک کے قومی ترانے بجائے گئے جبکہ مسلح افواج کے چاق و چوبند دستے نے ایرانی صدر کو گارڈ آف آنر پیش کیا۔
صدر پزشکیان نے سلامی کے چبوترے سے اتر کر گارڈ آف آنر کا معائنہ کیا۔ بعد ازاں وزیراعظم شہباز شریف نے ایرانی صدر کا اپنی کابینہ سے تعارف کرایا، جب کہ مہمان صدر نے بھی اپنی کابینہ کے ارکان کا تعارف وزیراعظم پاکستان سے کرایا۔
تقریب کے بعد ایرانی صدر نے ایوانِ وزیراعظم کے لان میں یادگاری پودا بھی لگایا، جو دونوں برادر اسلامی ممالک کے مابین دوستی اور پائیدار تعلقات کی علامت سمجھا جا رہا ہے۔
ایرانی صدر کا یہ دورہ دونوں ممالک کے درمیان اقتصادی، تجارتی، توانائی اور سرحدی تعاون سمیت دیگر اہم شعبہ جات میں تعلقات کو مزید مضبوط بنانے کے لیے نہایت اہم قرار دیا جا رہا ہے۔
