اسلامی جمہوریہ ایران کے اسپیکر ڈاکٹر محمد باقر قالیباف اپنے وفد کے ہمراہ جمعہ کے روز وزیراعظم ہاؤس پہنچے جہاں وزیراعظم شہباز شریف نے ان کا خیرمقدم کیا۔ ملاقات میں دوطرفہ تعلقات، علاقائی امور اور باہمی تعاون کے فروغ پر تفصیلی تبادلہ خیال کیا گیا۔
وزیراعظم شہباز شریف نے پاکستان اور ایران کے تعلقات کو برادرانہ، تاریخی اور باہمی اعتماد پر مبنی قرار دیتے ہوئے کہا کہ دونوں ممالک کے عوام مذہبی، ثقافتی اور تاریخی رشتوں میں جڑے ہوئے ہیں۔ انہوں نے تجارت، توانائی اور سرحدی تعاون کے فروغ پر زور دیا۔
ایرانی اسپیکر ڈاکٹر محمد باقر قالیباف نے کہا کہ ایران پاکستان کے ساتھ پارلیمانی اور اقتصادی تعاون کو وسعت دینے کا خواہاں ہے۔ انہوں نے اس بات پر زور دیا کہ خطے میں امن و ترقی کے لیے دونوں ممالک کا باہمی تعاون نہایت اہم ہے۔
دونوں رہنماؤں نے مختلف شعبوں میں عملی اقدامات کے ذریعے دوطرفہ تعلقات کو مزید مضبوط بنانے پر اتفاق کیا۔
