(ویب ڈیسک) ایران نے قطر میں مبینہ طور پر قید رکھے گئے تین ایرانی پائلٹوں کی رہائی کا مطالبہ کیا ہے۔
ایرانی حکام نے ہفتے کے روز ان تین پائلٹوں کی رہائی کا مطالبہ کیا ہے جو ان کے بقول مشرق وسطیٰ کی جنگ کے دوران قطر میں پکڑے گئے تھے۔
فارس خبر رساں ایجنسی نے رپورٹ کیا کہ ایرانی مسلح افواج کے جنرل محمد باقر زادہ نے کہا، "قطری افواج نے جنگ کے دوران Su-24 لڑاکا طیاروں کے گر کر تباہ ہونے کے بعد تین ایرانی پائلٹوں کو زندہ پکڑ لیا تھا۔”
جنرل باقر زادہ نے نے بین الاقوامی کمیٹی آف ریڈ کراس کو لکھے گئے ایک خط میں کہا کہ "جواد صالحی، عبدالمجید دشتیان اور عمران بہرویشان کو قطری افواج نے چھ ماہ سے حراست میں رکھا ہوا ہے۔”
خط میں، جنرل باقر زادہ نے ان کی رہائی کا مطالبہ کرتے ہوئے کہا کہ پائلٹوں کو ان کے اہل خانہ سے ملنے یا رابطہ کرنے کی اجازت نہیں دی گئی تھی۔
گزشتہ ماہ، ایران کی فوج نے کہا تھا کہ اس نے ایرانی پائلٹ ماجد کاظمی کی لاش برآمد کر لی ہے، جو مارچ کے اوائل میں قطر میں العدید ایئر بیس پر حملے کے دوران مارا گیا تھا۔
ایران نے پہلے کہا تھا کہ اس کے کئی دیگر پائلٹ لاپتہ ہیں، لیکن اس وقت ان کی مبینہ گرفتاری کی خبر کو عام نہیں کیا گیا تھا۔
