یمن کی سڑکوں پر چیزیں بیچنے والا نیلی آنکھوں کا بچہ راتوں رات سپر اسٹار بن گیا

یمن کی سڑکوں پر چیزیں بیچنے والا نیلی آنکھوں کا بچہ راتوں رات سپر اسٹار بن گیا

یمن سمیت خطے کے دیگر ممالک میں رسام کی شہرت تیزی سے پھیل رہی ہے

جنگ اور طویل خانہ جنگی سے متاثرہ یمن میں ایک 12 سالہ بچے کی غیر معمولی نیلی آنکھوں نے سوشل میڈیا صارفین کو حیران کردیا اور سڑکوں پر چیزیں فروخت کرنے والا یہ بچہ دیکھتے ہی دیکھتے انٹرنیٹ کی نئی سنسنی خیز خبر بن گیا۔

صوبہ ذمار کے علاقے آنس ڈویژن سے تعلق رکھنے والے 12 سالہ رسام الآنسی کی ایک مختصر ویڈیو چند روز قبل سوشل میڈیا پر سامنے آئی جس کے بعد اس کی منفرد شخصیت اور نیلی آنکھوں نے لاکھوں نہیں بلکہ کروڑوں لوگوں کی توجہ حاصل کرلی۔

رپورٹس کے مطابق رسام کی ویڈیو کو اب تک 3 کروڑ سے زائد صارفین دیکھ چکے ہیں جبکہ تقریباً 7 لاکھ افراد نے ویڈیو کو پسند کرتے ہوئے اپنی دلچسپی کا اظہار کیا۔

رسام الآنسی روزمرہ زندگی میں سڑکوں پر مختلف اشیا فروخت کرتا ہے مگر ایک ویڈیو نے اس کی زندگی کا رخ بدل دیا۔ ویڈیو وائرل ہونے کے بعد مختلف سوشل میڈیا انفلوئنسرز نے بھی اس کی تصاویر اور مزید ویڈیوز شیئر کرنا شروع کردیں۔

یمن سمیت خطے کے دیگر ممالک میں رسام کی شہرت تیزی سے پھیل رہی ہے۔ غیر معمولی مقبولیت کے بعد بچے نے صرف دو روز قبل اپنا ذاتی سوشل میڈیا اکاؤنٹ بنایا جسے انتہائی مختصر وقت میں ایک لاکھ 18 ہزار سے زائد افراد نے فالو کرلیا۔

دلچسپ بات یہ ہے کہ سوشل میڈیا پر شہرت حاصل کرنے کے بعد رسام الآنسی کے لیے نئے مواقع کے دروازے بھی کھلنے لگے ہیں۔ مختلف کمپنیوں اور ٹی وی چینلز کی جانب سے اسے کام اور دیگر سرگرمیوں کے لیے پیشکشیں موصول ہونا شروع ہوگئی ہیں۔

سڑکوں پر چیزیں فروخت کرنے والا یہ 12 سالہ بچہ اب یمن کے سوشل میڈیا صارفین کی توجہ کا مرکز بن چکا ہے اور اس کی نیلی آنکھوں نے اسے چند ہی دنوں میں ایک عام بچے سے انٹرنیٹ کی نئی وائرل شخصیت بنا دیا ہے۔