جنوبی کوریا: سرکاری ملازمتوں کے انٹرویوز میں جینز کی اجازت، ٹائی اور رسمی جوتوں پر پابندی

kor d


سیول: جنوبی کوریا کی وزارتِ پرسنل مینجمنٹ نے قومی سول سروس ملازمتوں کے انٹرویوز کے لیے نئے لباس کے رہنما اصول جاری کیے ہیں، جن کے تحت امیدواروں کو جینز، اسنیکرز اور دیگر آرام دہ لباس پہننے کی ترغیب دی گئی ہے جبکہ ٹائی اور رسمی ڈریس شوز پر واضح پابندی عائد کر دی گئی ہے۔
اکتوبر 2026ء میں ہونے والے سرکاری انٹرویوز سے نافذ العمل ان قواعد کا مقصد امیدواروں پر مالی بوجھ اور نفسیاتی دباؤ کم کرنا ہے۔ تجویز کردہ لباس میں جینز، سوتی پتلون، سلیکس، نٹ ویئر، جیکٹس اور شرٹس شامل ہیں، جبکہ ایتھلیٹک لباس، ہائیکنگ کپڑے، شارٹس اور اونچی ایڑیاں ناپسندیدہ قرار دی گئی ہیں۔
وزارت کے مطابق ٹائی پہن کر آنے والے امیدواروں کو انٹرویو روم میں جانے سے پہلے ٹائی اتارنی ہوگی، جبکہ رسمی ڈریس شوز والوں کو اپنے جوتوں پر سلپ آن کور لگانا ہوں گے، کیونکہ سخت تلوں والے جوتوں کی آواز امتحانی سیشنز میں خلل ڈالتی ہے۔
وزارت نے مصنوعی ذہانت سے تیار کردہ نمونہ تصاویر بھی جاری کیں تاکہ امیدواروں کو قابلِ قبول لباس کا اندازہ ہو سکے۔ سوشل میڈیا پر اس فیصلے کو ملا جلا ردِعمل ملا ہے — کچھ نے اسے مالی راحت قرار دیا جبکہ دیگر نے نئی الجھن پیدا ہونے کا خدشہ ظاہر کیا۔

متعلقہ پوسٹ