وزیراعظم شہباز شریف کا اقوام متحدہ سے خطاب، مشرق وسطیٰ میں امن کی اپیل، بھارت کو پانی کو ہتھیار بنانے کے خلاف خبردار

اقوام متحدہ: وزیراعظم محمد شہباز شریف نے مشرق وسطیٰ میں بڑھتے ہوئے تنازعات کے خاتمے کے لیے سفارت کاری پر زور دیا اور بھارت کو خبردار کیا کہ پاکستان کے دریائی پانی کے حصے کو روکنے، متاثر کرنے یا موڑنے کی کسی بھی کوشش کو اعلانِ جنگ تصور کیا جائے گا۔
اقوام متحدہ جنرل اسمبلی کے 81ویں اجلاس سے خطاب کرتے ہوئے وزیراعظم نے کہا کہ پاکستان نے تصادم پر مکالمہ، جبر پر تعاون اور جنگ پر امن کو ترجیح دی ہے۔ ان کا کہنا تھا کہ "جنگ ایک انتخاب ہے، امن بھی ایک انتخاب ہے، اور بعض اوقات اصل جرات جنگ چھیڑنے میں نہیں بلکہ اسے روکنے میں ہوتی ہے۔”
شہباز شریف نے پاک ایران کشیدگی کے دوران اسلام آباد میں واشنگٹن اور تہران کو مذاکرات کی میز پر لانے میں پاکستان کے کردار کا ذکر کیا، جس کے نتیجے میں اسلام آباد میمورنڈم آف انڈرسٹینڈنگ پر دستخط ہوئے، اور اس کوشش پر نائب وزیراعظم و وزیر خارجہ اسحاق ڈار اور آرمی چیف فیلڈ مارشل سید عاصم منیر کو سراہا۔ انہوں نے سعودی عرب پر حوثی حملوں، بالخصوص مکہ مکرمہ کو نشانہ بنانے کی مبینہ کوشش کی شدید مذمت کی اور حرمین شریفین کی حفاظت کو "ریڈ لائن” قرار دیا۔
پاک بھارت کشیدگی کے تناظر میں وزیراعظم نے کہا کہ مسلح افواج نے دفاع کا حق استعمال کرتے ہوئے دشمن کو ایسا سبق سکھایا جو وہ کبھی نہیں بھولے گا، جبکہ امریکی صدر ٹرمپ کی مداخلت کو دونوں ایٹمی ہمسایہ ممالک کے درمیان بڑے تصادم کو روکنے میں معاون قرار دیا۔ انہوں نے مسئلہ جموں و کشمیر کے منصفانہ حل کو خطے میں پائیدار امن کے لیے ناگزیر قرار دیا اور بھارت پر مقبوضہ کشمیر میں انسانی حقوق کی خلاف ورزیوں کا الزام عائد کیا۔
آبی مسئلے پر وزیراعظم نے کہا کہ پانی کو کبھی ہتھیار نہیں بنایا جانا چاہیے اور سندھ طاس معاہدے کو معطل کرنے کے بھارتی فیصلے کی کوئی قانونی حیثیت نہیں۔ انہوں نے غزہ میں فلسطینی بچوں، بشمول ہند رجب اور وفا عاقلہ کی ہلاکتوں کا ذکر کرتے ہوئے عالمی برادری کی خاموشی کو تنقید کا نشانہ بنایا اور 1967ء کی سرحدوں پر مبنی آزاد فلسطینی ریاست کے قیام کا مطالبہ دہرایا۔ دہشت گردی کے خلاف جنگ میں پاکستان کی قربانیوں کا ذکر کرتے ہوئے انہوں نے کہا کہ ملک تقریباً ایک لاکھ افراد کھو چکا ہے اور 150 ارب ڈالر سے زائد کا معاشی نقصان اٹھا چکا ہے، اور افغان سرزمین کے دہشت گردی کے لیے استعمال کو فوری روکنے کا مطالبہ کیا۔