پاکستان نے سہ ملکی ون ڈے سیریز کے چوتھے میچ میں شاداب خان کی ناقابل شکست سنچری کی بدولت انگلینڈ کے خلاف ناممکن دکھائی دینے والی فتح اپنے نام کرلی۔ گرین شرٹس نے 242 رنز کا ہدف 48ویں اوور میں 9 وکٹوں کے نقصان پر حاصل کرکے مقابلہ ایک وکٹ سے جیت لیا۔
پاکستانی ٹیم خواتین میں چھاتی کے سرطان سے متعلق آگاہی اجاگر کرنے کے لیے گلابی کٹ پہن کر میدان میں اتری۔ پاکستان نے ٹاس جیت کر پہلے فیلڈنگ کا فیصلہ کیا، جس کے بعد انگلینڈ کی پوری ٹیم 47ویں اوور میں 241 رنز بنا کر آؤٹ ہوگئی۔
انگلینڈ کی اننگز ابتدا ہی سے مشکلات کا شکار رہی۔ شاہین شاہ آفریدی نے پہلے اوور میں ٹام بینٹن کو 4 رنز پر آؤٹ کیا، پھر تیسرے اوور میں جو روٹ کی 5 رنز کی اننگز کا خاتمہ کردیا۔ ہیری بروک بھی رن آؤٹ ہوکر پویلین لوٹ گئے، جبکہ حارث رؤف نے انگلینڈ کی چوتھی وکٹ حاصل کی۔ اس طرح مہمان ٹیم کے 52 رنز پر چار کھلاڑی آؤٹ ہوچکے تھے۔
ابتدائی نقصان کے باوجود بین ڈکٹ نے مزاحمت جاری رکھی اور 105 رنز کی شاندار اننگز کھیل کر انگلینڈ کو قابلِ مقابلہ مجموعے تک پہنچایا۔ سیم کرن نے 42 جبکہ گس اٹکنسن نے 36 رنز بنائے، تاہم دیگر بلے باز بڑی اننگز کھیلنے میں ناکام رہے۔
پاکستان کی جانب سے کپتان شاہین شاہ آفریدی سب سے کامیاب بولر رہے اور انہوں نے چار وکٹیں حاصل کیں۔ اس دوران شاہین نے ون ڈے انٹرنیشنل کرکٹ میں 150 وکٹیں مکمل کرنے کا سنگ میل بھی عبور کیا۔ رضا اللہ اور عرفات منہاس نے دو، دو جبکہ حارث رؤف نے ایک وکٹ حاصل کی۔
242 رنز کے تعاقب میں پاکستان کی بیٹنگ بھی لڑکھڑا گئی۔ فخر زمان 10، صائم ایوب 6 اور بابر اعظم 10 رنز بنا کر آؤٹ ہوگئے، جبکہ سعد بیگ نے 32، سلمان آغا نے 26 اور حسن نواز نے 15 رنز بنائے۔ مسلسل وکٹیں گرنے کے باعث پاکستان کی پوزیشن نازک ہوگئی اور میچ انگلینڈ کے حق میں جاتا دکھائی دینے لگا۔
ایسے مشکل وقت میں آٹھویں نمبر پر بیٹنگ کے لیے آنے والے شاداب خان نے ذمہ داری سنبھالی اور انگلش بولرز کے خلاف بھرپور جوابی حملہ کیا۔ انہوں نے حارث رؤف کے ساتھ مل کر نہ صرف وکٹیں گرنے کا سلسلہ روکا بلکہ پاکستان کو فتح کے قریب بھی پہنچا دیا۔
شاداب 97 رنز پر تھے جب امپائر نے انہیں ایل بی ڈبلیو آؤٹ قرار دیا، تاہم ریویو لینے پر فیصلہ تبدیل ہوگیا اور وہ ناٹ آؤٹ رہے۔ اس کے بعد انہوں نے اپنی سنچری مکمل کی اور پاکستان کی جیت یقینی بنانے میں اہم کردار ادا کیا۔
شاداب خان نے 96 گیندوں پر 113 رنز کی ناقابل شکست اننگز کھیلی، جس میں 13 چوکے اور 5 چھکے شامل تھے۔ یہ ان کے ون ڈے انٹرنیشنل کیریئر کی پہلی سنچری تھی۔ دوسری جانب حارث رؤف نے آخری مرحلے میں ان کا بھرپور ساتھ دیا اور 7 رنز بنا کر ناٹ آؤٹ رہے۔
دونوں بلے بازوں نے آخری وکٹ کی شراکت میں 89 رنز جوڑ کر میچ کا پانسہ پلٹ دیا۔ پاکستان نے 48ویں اوور میں 9 وکٹوں کے نقصان پر 242 رنز مکمل کیے اور انگلینڈ کو ایک وکٹ سے شکست دے دی۔
شاداب خان کی غیر معمولی اننگز نے پاکستان کو شکست کے دہانے سے نکال کر یادگار فتح سے ہمکنار کیا، جبکہ شاہین آفریدی کی چار وکٹوں نے انگلینڈ کو محدود رکھنے میں بنیادی کردار ادا کیا۔
