بیجنگ (نمائندہ خصوصی) — صدرِ پاکستان آصف علی زرداری نے چین کے ایوی ایشن انڈسٹری کارپوریشن (AVIC) کے ایئرکرافٹ کمپلیکس کا تاریخی دورہ کیا۔ یہ دورہ بھارت کے ساتھ جنگ بندی کے 128ویں دن انجام پایا۔
صدر مملکت مسلح افواج کے سپریم کمانڈر کی حیثیت سے AVIC پہنچے، جہاں انہیں جے-10 سی، جے ایف-17 اور جے-20 اسٹیلتھ فائٹرز سمیت ڈرونز، خودکار یونٹس اور ملٹی ڈومین آپریشنز پر تفصیلی بریفنگ دی گئی۔ صدر نے انجینئرز اور سائنسدانوں سے بھی ملاقات کی۔
صدر زرداری کو بتایا گیا کہ جے-10 سی اور جے ایف-17 طیاروں نے مئی 2025 کے معرکۂ حق اور آپریشن بنیان المرصوص میں کلیدی کردار ادا کیا۔ صدر نے ان طیاروں کو پاک فضائیہ کی طاقت اور پاکستان کے دفاعی نظام کی ریڑھ کی ہڈی قرار دیا۔
انہوں نے کہا کہ "جے-10 اور جے ایف-17 نے پاک فضائیہ کو مزید مضبوط بنایا ہے اور یہ پاک-چین اسٹریٹجک شراکت داری کی عملی علامت ہیں۔”
صدر زرداری اس کمپلیکس کا دورہ کرنے والے پہلے غیر ملکی سربراہ ہیں۔ ان کے ہمراہ چیئرمین پیپلز پارٹی بلاول بھٹو زرداری، خاتون اول بی بی آصفہ بھٹو زرداری اور سینیٹر سلیم مانڈوی والا بھی موجود تھے۔ اس موقع پر پاکستان کے سفیر خلیل ہاشمی اور چین کے سفیر جیانگ زائی ڈونگ بھی شریک تھے۔
صدر مملکت نے کہا کہ پاکستان چین کے ساتھ دفاعی پیداوار اور ہوا بازی میں تعاون کو مزید وسعت دینے کا عزم رکھتا ہے۔
صدر آصف علی زرداری کا چین کے ایوی ایشن انڈسٹری کارپوریشن (AVIC) کے ایئرکرافٹ کمپلیکس کا تاریخی دورہ 3
