حنا جاوید قتل کیس؛ 88 روز بعد بھی چالان پیش نہ ہونے پر پراسیکیوشن برہم

hina jawaid murder case1791512092 0



راولپنڈی میں ڈیجیٹل ڈیزائنر حنا جاوید کے قتل کیس میں 88 روز گزرنے کے باوجود چالان پیش نہ کیے جانے پر ڈسٹرکٹ پراسیکیوشن برانچ نے سخت برہمی کا اظہار کرتے ہوئے سٹی پولیس آفیسر کو خط لکھ دیا۔

پراسیکیوشن برانچ کے مطابق پولیس 14 روز میں چالان پیش کرنے کی پابند ہے، تاہم تاحال مقدمے کا چالان جمع نہیں کرایا گیا۔

پراسیکیوشن برانچ نے تفتیشی ٹیم اور ایس ایچ او کو فوری طور پر چالان پیش کرنے کا پابند بنانے کا مطالبہ کیا ہے۔ خط کی نقل آئی جی پنجاب اور وزیراعلیٰ سیکریٹریٹ کو بھی ارسال کر دی گئی ہے۔ وکلا کا کہنا ہے کہ سنگین مقدمات میں تاخیر سے چالان پیش کرنا معمول بن چکا ہے۔

دوسری جانب حنا جاوید قتل کیس کی تفتیش میں اہم پیش رفت سامنے آئی ہے۔ پولیس ذرائع کے مطابق مقدمے میں جنسی زیادتی کی دفعہ 376 بھی شامل کر لی گئی ہے، اس سے قبل ایف آئی آر میں صرف قتل کی دفعہ 302 شامل تھی۔

پولیس ذرائع کا کہنا ہے کہ ڈی این اے رپورٹ میں حنا جاوید کو قتل سے قبل جنسی زیادتی کا نشانہ بنائے جانے کا انکشاف ہوا تھا، جبکہ رپورٹ میں ملازم ذیشان کے نمونے بھی پائے گئے۔ ذرائع کے مطابق حنا جاوید کو ان کے ملازم ذیشان نے زیادتی کا نشانہ بنایا تھا۔

پولیس ذرائع کا کہنا ہے کہ کیس کی تفتیش دستیاب شواہد کی بنیاد پر آگے بڑھائی جا رہی ہے۔ حنا جاوید کے قتل کے الزام میں ان کے شوہر ڈاکٹر فیصل اور ملازم ذیشان کے ملوث ہونے کا الزام ہے۔



Source link

متعلقہ پوسٹ