یوکوہاما (نمائندہ خصوصی):
وزیراعلیٰ پنجاب مریم نواز شریف نے جاپان کے ترقی یافتہ شہر یوکوہاما میں واقع تجارتی، اقتصادی اور ثقافتی مرکز کا خصوصی دورہ کیا، جس کا مقصد پنجاب میں اقتصادی ترقی، غیر ملکی سرمایہ کاری کے فروغ اور بین الاقوامی تعلقات کو مزید مضبوط بنانا تھا۔
دورے کے دوران وزیراعلیٰ کو یوکوہاما کے جدید تجارتی نظام، صنعتی ڈھانچے، ٹیکنالوجی کے اطلاق اور ثقافتی سرگرمیوں کے حوالے سے تفصیلی بریفنگ دی گئی۔
مریم نواز نے کہا کہ جاپان کی ترقی یافتہ ٹیکنالوجی اور مضبوط معاشی نظام پاکستان، خصوصاً پنجاب کے لیے قابلِ تقلید ماڈل ہیں۔ انہوں نے اس عزم کا اظہار کیا کہ پنجاب میں سرمایہ کاری اور اقتصادی ترقی کے نئے باب کھولنے کے لیے جاپان کے ساتھ دوطرفہ تعلقات کو مزید وسعت دی جائے گی۔
وزیراعلیٰ مریم نوازکا کہنا : "ہم چاہتے ہیں کہ پنجاب جاپان جیسے ترقی یافتہ ممالک کے ساتھ سیکھنے، تعاون اور سرمایہ کاری کی بنیاد پر آگے بڑھے۔ یوکوہاما میں جو کچھ دیکھا، وہ متاثر کن اور قابلِ عمل ہے۔”
یاد رہے کہ جاپان کا شہر یوکوہاما نہ صرف ملک کا ایک اہم تجارتی اور صنعتی مرکز ہے بلکہ بین الاقوامی ثقافتی تبادلوں کا بھی بڑا مرکز سمجھا جاتا ہے۔
ماہرین کا ماننا ہے کہ اس دورے سے پاکستان-جاپان تعلقات میں نئی جہت پیدا ہوگی، اور پنجاب میں غیر ملکی سرمایہ کاری، صنعتی تعاون اور ٹیکنالوجی ٹرانسفر کے مزید مواقع پیدا ہوں گے۔