دبئی ایئر شو میں بھارتی افسران کی جے ایف-17 کے ساتھ تصاویر — پاک فضائیہ نے تصدیق کر دی

فائزہ یونس پاکستان اسلام آباد   (نمائندہ وائس آف جرمنی )دبئی میں جاری ایئر شو کے دوران سامنے آنے والی چند تصاویر نے سوشل میڈیا پر نہ صرف دلچسپی پیدا کی بلکہ ایک بحث کو بھی جنم دیا، جن میں انڈین ایئر فورس اور انڈین نیوی کے افسران پاکستان کے تیار کردہ جے ایف-17 تھنڈر طیارے کے سامنے تصاویر اور سیلفیاں بناتے ہوئے دکھائی دے رہے تھے۔ ان تصاویر کے مستند ہونے سے متعلق بی بی سی نے پاکستان ایئر فورس کے ترجمان سے رابطہ کیا۔
ترجمان پاک فضائیہ نے بی بی سی کے سوال کے جواب میں ان تصاویر کی تصدیق کرتے ہوئے بتایا کہ بھارتی فضائیہ اور بحریہ کے افسران واقعی دبئی ایئر شو میں جے ایف-17 تھنڈر کے سامنے تصاویر بنواتے رہے۔ ترجمان کے مطابق یہ سرگرمیاں ایئر شو کے معمول کا حصہ ہوتی ہیں، جہاں مختلف ممالک کے وفود ایک دوسرے کے ہتھیاروں، دفاعی سازوسامان اور ٹیکنالوجی میں دلچسپی کا اظہار کرتے ہیں۔
ترجمان نے مزید بتایا کہ جے ایف-17 تھنڈر پاکستان اور چین کے اشتراک سے تیار کردہ ایک کثیر المقاصد لڑاکا طیارہ ہے، جو گزشتہ کئی برسوں سے مختلف بین الاقوامی ایئر شوز میں اپنی کارکردگی اور کم لاگت کے باعث توجہ کا مرکز رہا ہے۔ دبئی ایئر شو میں بھی متعدد ممالک کے دفاعی وفود نے اس طیارے کا قریب سے جائزہ لیا۔
انہوں نے کہا کہ "ایئر شوز ایک اوپن پلیٹ فارم ہوتے ہیں جہاں دفاعی ماہرین اور فوجی افسران ایک دوسرے کے تیار کردہ نظاموں کا تجزیہ کرتے ہیں، اور اس دوران تصاویر بنانا ایک معمول کی بات ہے۔”
دبئی ایئر شو میں اس بار بڑی تعداد میں عسکری وفود شریک ہوئے اور مختلف ممالک کے جنگی طیاروں، ڈرونز، میزائل سسٹمز اور جدید ٹیکنالوجی کی نمائش کی گئی۔ جے ایف-17 تھنڈر کا اسٹال بھی غیر ملکی مندوبین کی دلچسپی کا مرکز رہا۔