اسلام آباد: محکمہ موسمیات نے پیش گوئی کی ہے کہ ملک کے مغربی اور بالائی علاقوں میں 20 سے 22 دسمبر کے دوران بارش جب کہ پہاڑی علاقوں میں برف باری کا امکان ہے۔
محکمہ موسمیات کے مطابق مغربی ہواؤں کا نیا سلسلہ 19 دسمبر کو بلوچستان میں داخل ہوگا جو 20 دسمبر کو ملک کے بالائی علاقوں کو بھی اپنی لپیٹ میں لے لے گا۔ 19 دسمبر کی شام سے 20 دسمبر کے دوران بلوچستان کے مختلف علاقوں میں بارش اور پہاڑوں پر برف باری متوقع ہے۔
بلوچستان
کوئٹہ، زیارت، چمن، قلعہ عبداللہ اور قلعہ سیف اللہ میں بارش اور برف باری کا امکان ظاہر کیا گیا ہے جب کہ نوشکی، ہرنائی، ژوب، موسیٰ خیل، زیارت اور تربت میں بھی بارش اور برف باری ہوسکتی ہے۔
بلوچستان کے ساحلی علاقوں کیچ، گوادر، جیوانی اور لسبیلہ میں ہلکی بارش کی پیش گوئی کی گئی ہے۔
خیبرپختونخوا
خیبر پختونخوا کے مختلف اضلاع میں بھی بارش اور برف باری کا امکان ہے۔ چترال، دیر، سوات، کوہستان، شانگلہ، ایبٹ آباد، ہری پور اور مانسہرہ میں بارش اور پہاڑوں پر برف باری متوقع ہے جب کہ بونیر، باجوڑ، مہمند، خیبر، اورکزئی، کرم اور وزیرستان میں وقفے وقفے سے بارش ہوسکتی ہے۔
پشاور، چارسدہ، نوشہرہ، صوابی، بنوں، کرک، ڈیرہ اسماعیل خان، ٹانک اور کوہاٹ میں تیز ہواؤں اور گرج چمک کے ساتھ بارش کی پیش گوئی کی گئی ہے۔
محکمہ موسمیات کے مطابق خیبر پختونخوا کے پہاڑی علاقوں میں درمیانے درجے کی برف باری متوقع ہے۔
گلگت بلتستان
گلگت بلتستان میں 20 دسمبر کی رات سے 23 دسمبر کی صبح کے دوران وقفے وقفے سے بارش اور درمیانے درجے کی برف باری کا امکان ہے۔
دیامر، غذر، اسکردو، ہنزہ اور گلگت میں بارش اور برف باری متوقع ہے جب کہ گانچھے اور شگر میں بھی برف باری ہوسکتی ہے۔ بعض مقامات پر شدید برف باری کی بھی توقع ظاہر کی گئی ہے۔
آزاد کشمیر
کشمیر کے مختلف علاقوں میں بھی بارش اور برف باری کی پیش گوئی کی گئی ہے۔ وادی نیلم، مظفرآباد، پونچھ اور ہٹیاں میں بارش اور پہاڑوں پر برف باری متوقع ہے جب کہ باغ، حویلی، سدھنوتی، کوٹلی، بھمبر اور میرپور میں تیز ہواؤں اور گرج چمک کے ساتھ بارش کا امکان ہے۔
پنجاب اور اسلام آباد
محکمہ موسمیات کے مطابق پنجاب اور اسلام آباد میں بھی 20 دسمبر کی شام سے بارش متوقع ہے۔ اسلام آباد، راولپنڈی، خطہ پوٹھوہار، میانوالی، بھکر، نورپور تھل اور لیہ میں بارش ہوسکتی ہے جب کہ مری اور گلیات میں 20 سے 21 دسمبر کے دوران تیز ہواؤں اور گرج چمک کے ساتھ بارش اور پہاڑوں پر برف باری کا امکان ہے۔
سرگودھا، خوشاب، فیصل آباد، حافظ آباد اور گوجرانوالہ میں مطلع ابر آلود رہنے کا امکان ہے جب کہ گجرات، سیالکوٹ، نارووال، لاہور، شیخوپورہ، جھنگ، ڈیرہ غازی خان اور ٹوبہ ٹیک سنگھ میں بوندا باندی متوقع ہے۔
سندھ
محکمہ موسمیات نے بتایا کہ 19 اور 20 دسمبر کے دوران سندھ کے بیشتر علاقوں میں موسم جزوی طور پر ابر آلود رہے گا۔
محکمہ موسمیات نے خبردار کردیا
محکمہ موسمیات نے خبردار کیا ہے کہ 20 سے 22 دسمبر کے دوران شدید برف باری کے باعث ناران، کاغان، سوات، دیر اور کوہستان میں سڑکیں بند ہونے کا خدشہ ہے۔
مانسہرہ، ایبٹ آباد، شانگلہ، استور، ہنزہ اور اسکردو میں بھی ٹریفک کی روانی متاثر ہوسکتی ہے۔ مری، گلیات، وادی نیلم، باغ، پونچھ اور حویلیاں میں بھی سڑکیں بند ہونے کا امکان ہے۔
محکمہ موسمیات اور متعلقہ اداروں نے شہریوں اور سیاحوں کو احتیاطی تدابیر اختیار کرنے اور غیر ضروری سفر سے گریز کرنے کی ہدایت کی ہے۔
