فٹ بال کی عالمی تنظیم فیفا نے ورلڈ کپ 2026ء کے لیے تاریخ کی سب سے بڑی انعامی رقم کا اعلان کر دیا ہے۔
فیفا کے مطابق 2026ء کے فٹ بال ورلڈ کپ میں مجموعی طور پر 65 کروڑ 50 لاکھ امریکی ڈالر (تقریباً 183 ارب پاکستانی روپے) کی انعامی رقم تقسیم کی جائے گی۔ اس سے قبل ورلڈ کپ 2022ء میں مجموعی انعامی رقم 44 کروڑ ڈالر تھی۔
اعلامیے کے مطابق ورلڈ کپ 2026ء کی فاتح ٹیم کو 5 کروڑ ڈالر دیے جائیں گے، جبکہ گزشتہ ایڈیشن میں یہ رقم 4 کروڑ 20 لاکھ ڈالر تھی۔
رنر اپ ٹیم کو 3 کروڑ 30 لاکھ ڈالر، تیسری پوزیشن حاصل کرنے والی ٹیم کو 2 کروڑ 90 لاکھ ڈالر اور چوتھی پوزیشن پر آنے والی ٹیم کو 2 کروڑ 70 لاکھ ڈالر ملیں گے۔
فیفا کے مطابق:
پانچویں سے آٹھویں پوزیشن کی ٹیموں کو 1 کروڑ 90 لاکھ ڈالر
نویں سے سولہویں پوزیشن کی ٹیموں کو 1 کروڑ 50 لاکھ ڈالر
سترہویں سے بتیسویں پوزیشن کی ہر ٹیم کو 1 کروڑ 10 لاکھ ڈالر
جبکہ تینتیسویں سے اڑتالیسویں پوزیشن کی ہر ٹیم کو 90 لاکھ ڈالر دیے جائیں گے۔
اس کے علاوہ ورلڈ کپ کے لیے کوالیفائی کرنے والی ہر ٹیم کو تیاریوں کے لیے 15 لاکھ ڈالر اضافی فراہم کیے جائیں گے۔
یاد رہے کہ فیفا ورلڈ کپ 2026ء اگلے برس امریکا، کینیڈا اور میکسیکو میں منعقد ہوگا، جس میں پہلی بار 48 ٹیمیں شرکت کریں گی۔
