لبنان سے حملوں کا خوف: نیتن یاہو نے اہم ترین مذہبی اجتماع منسوخ کر دیا

یروشلم — اسرائیلی وزیراعظم بنیامین نیتن یاہو نے لبنان کی جانب سے ممکنہ راکٹ اور میزائل حملوں کے خطرے کے پیش نظر یہودیوں کے مشہور مذہبی اجتماع "لَگ باؤمر” کو منسوخ کرنے کا اعلان کردیا۔
یہ تقریب ہر سال شمالی اسرائیل میں واقع کوہِ میرون پر انتہائی جوش و خروش کے ساتھ منائی جاتی ہے، جہاں لاکھوں یہودی عقیدت مند جمع ہوتے ہیں۔ تاہم اس بار سکیورٹی حکام نے خبردار کیا کہ اتنی بڑی تعداد میں لوگوں کا اجتماع دشمن کے لیے ایک آسان ہدف بن سکتا ہے۔
اسرائیلی حکومت کے ایک اعلیٰ عہدیدار کے مطابق حزب اللہ کی جانب سے سرحد پار حملوں کا سنگین خطرہ موجود ہے اور شہریوں کی حفاظت کو ہر چیز پر مقدم رکھا جائے گا۔ فوجی و انٹیلی جنس حکام کی سفارشات کے بعد وزیراعظم نیتن یاہو نے یہ مشکل فیصلہ کیا۔
لَگ باؤمر یہودی کیلنڈر کی ایک اہم تاریخ ہے جس میں دوسری صدی کے معروف یہودی عالم ربی شمعون بار یوخائی کی یاد منائی جاتی ہے۔ اس موقع پر روشنیاں جلانا، رقص و سرود اور اجتماعی دعائیں اس تقریب کا خاص حصہ ہوتی ہیں۔
مذہبی حلقوں میں اس فیصلے پر ملے جلے ردِعمل سامنے آئے ہیں۔ کچھ مذہبی رہنماؤں نے حفاظتی اقدامات کو سراہا جبکہ بعض نے اسے یہودی روایات پر سمجھوتہ قرار دیا۔