یوم عاشورہ: پاکستان بھر میں شہدائے کربلا کی یاد میں جلوس، سیکیورٹی ہائی الرٹ

IMG 20260626 WA1208


کراچی / اسلام آباد — 26 جون 2026
پاکستان میں آج یوم عاشورہ عقیدت و احترام کے ساتھ منایا جا رہا ہے۔ نواسہ رسول ﷺ، سیدنا حضرت امام حسین رضی اللہ تعالیٰ عنہ اور ان کے وفادار ساتھیوں کی میدانِ کربلا میں عظیم قربانی کی یاد میں ملک بھر کے تمام بڑے شہروں میں مرکزی جلوس نکالے جا رہے ہیں۔
جلوسوں میں شبیہ علم، تابوت اور ذوالجناح شامل ہیں جو ہر سال اس یادگار دن کی علامات کے طور پر پیش کیے جاتے ہیں۔ عزاداران کربلا بھاری تعداد میں ان جلوسوں میں شریک ہو کر اپنے والہانہ جذبات کا اظہار کر رہے ہیں۔
سیکیورٹی کے سخت انتظامات کے تحت جلوسوں کے راستوں پر غیر ضروری آمدورفت بند کر دی گئی ہے۔ حساس علاقوں میں موبائل فون اور انٹرنیٹ سروس معطل کر دی گئی ہے جبکہ دفعہ 144 نافذ ہے جس کے تحت اسلحے کی نمائش پر مکمل پابندی عائد ہے۔
حکام نے شہریوں سے امن و امان کو برقرار رکھنے اور جلوسوں کے روٹ سے گریز کرنے کی اپیل کی ہے۔

متعلقہ پوسٹ