کروشیا: ہزاروں ٹن کوڑاکرکٹ ہٹانے میں تاخیر پر حکومت کے خلاف زبردست احتجاج

زغریب
ملک کے وسطی علاقے سے ۳۰ ہزار ٹن سے زائد کوڑاکرکٹ ہٹانے کا کام شروع کرنے میں حکومتی سستی کے خلاف احتجاج کے لیے کروشیا کے دارالحکومت زغریب کے مرکزی چوک میں ہزاروں افراد جمع ہوگئے۔ مقامی کارکنوں کا کہنا ہے کہ یہ کوڑاکرکٹ علاقے کے پینے کے پانی کو آلودہ کر رہا ہے۔
حالیہ برسوں کے سب سے بڑے احتجاجی مظاہروں میں شمار کیے جانے والے اس اجتماع کو "لیکائی کے لیے مارچ” کا نام دیا گیا، جو اس پہاڑی علاقے کی طرف اشارہ ہے جہاں کوڑاکرکٹ ذخیرہ کیا گیا ہے۔
حکام نے گزشتہ سال انکشاف کیا تھا کہ لیکائی علاقے کے قصبے گوسپچ کے قریب ایک مقام پر ۳۴ سے ۳۷ ہزار ٹن کوڑاکرکٹ موجود ہے، جس کا زیادہ تر حصہ ۲۰۲۳ اور ۲۰۲۴ میں اٹلی سے درآمد کیا گیا تھا۔ حکومت نے اس جگہ کو صاف کرنے کا عہد کیا تھا، لیکن ماحولیاتی تنظیموں کے مطابق پیش رفت برائے نام ہے۔ کارکنوں کا دعویٰ ہے کہ اس کوڑاکرکٹ میں طبی اور صنعتی فضلہ بھی شامل ہے، جو لیکائی کی ہوا، مٹی اور پانی کو آلودہ کر رہا ہے — ایک ایسا علاقہ جو اپنے وسیع قدرتی مناظر کے لیے مشہور ہے۔
مظاہرین نے "کروشیا کے پھیپھڑے اب مزید سانس لینے کے قابل نہیں رہے”، "کروشیا کی تباہی روکو” اور "قدرت معاف نہیں کرتی” جیسے نعروں والے بینرز اٹھا رکھے تھے۔ گوسپچ سے شرکت کے لیے آنے والی خاتون ویریکا یورنیاک نے کہا: "ہم حکومت کے ردعمل سے مطمئن نہیں ہیں۔ یہ جگہ بہت پہلے صاف ہو جانی چاہیے تھی۔ افسوسناک بات ہے کہ ہمارے بچوں اور ان کے مستقبل کی فکر کرنے والا کوئی نہیں۔”