چیٹ جی پی ٹی استعمال کرنے والے صارفین کو ایک نئے آن لائن فراڈ کا سامنا ہے، جس میں سائبر مجرمان صارفین کو جعلی پیغام کے ذریعے ایسے لنکس پر لے جانے کی کوشش کر رہے ہیں جو ان کے کمپیوٹر پر میلویئر انسٹال کر سکتے ہیں۔
رپورٹس کے مطابق یہ فراڈ اس وقت سامنے آتا ہے جب صارف گوگل پر چیٹ جی پی ٹی تلاش کرتا ہے۔ سرچ نتائج میں اسپانسرڈ اشتہار کے ذریعے صارف کو بظاہر چیٹ جی پی ٹی کی اصل ویب سائٹ تک پہنچایا جاتا ہے، تاہم وہاں ایک Custom GPT موجود ہوتا ہے جو ہر سوال کے جواب میں ایک مخصوص جعلی پیغام دکھاتا ہے۔
اس پیغام میں دعویٰ کیا جاتا ہے کہ بنیادی ڈومین پر سروس کی دستیابی محدود ہے اور صارف کو چیٹ جی پی ٹی پلس اپ گریڈ کرنے یا کسی متبادل ڈومین پر جانے کا آپشن دیا جاتا ہے۔
فراڈ کو زیادہ قابلِ یقین بنانے والی بات یہ ہے کہ صارف بظاہر اصل چیٹ جی پی ٹی ڈومین پر ہی موجود ہوتا ہے اور اگر وہ پہلے سے لاگ اِن ہو تو اس کا اکاؤنٹ بھی لاگ اِن دکھائی دیتا ہے۔
اس کے علاوہ جعلی کسٹم جی پی ٹی کا نام ’پلس 5.6‘ رکھا گیا ہے، جو عام صارف کے لیے بظاہر کسی نئے ماڈل یا پلس فیچر کا نام محسوس ہو سکتا ہے۔
ماہرین کے مطابق اصل خطرہ اس وقت پیدا ہوتا ہے جب صارف جعلی بیک اپ ڈومین یا کسی دوسرے لنک پر کلک کرتا ہے۔ ایسے لنکس صارف کو نقصان دہ ویب سائٹس تک لے جا سکتے ہیں جہاں میلویئر انسٹال ہونے یا حساس معلومات چوری ہونے کا خطرہ موجود ہے۔
صارفین کو مشورہ دیا گیا ہے کہ گوگل پر نظر آنے والے اسپانسرڈ نتائج پر اندھا اعتماد نہ کریں، غیر متوقع ’Service Availability Notice‘ جیسے پیغامات میں موجود لنکس پر کلک نہ کریں اور کسی بھی سافٹ ویئر یا فائل کو نامعلوم ویب سائٹ سے ڈاؤن لوڈ نہ کریں۔
Source link
