(ویب ڈیسک)برازیل کی حکومت نے جمعہ کے روز پیٹرول کی قیمتوں میں ریلیف کے اقدامات کی مدت مزید ایک ماہ کے لیے بڑھا دی۔
روئٹرز کے مطابق نئے صدارتی فرمان کے تحت پی آئی ایس/کوفنز اور سائیڈ ٹیکسوں کی مد میں فی لیٹر 0.89 ریئس (0.18 امریکی ڈالر) کی کمی کی جائے گی، جس کے نتیجے میں گیسولین پر وفاقی ٹیکس عملاً صفر ہو جائیں گے۔
صدر لوئیز اناسیو لولا دا سلوا کی جانب سے یہ اعلان اس ماہ ہونے والے صدارتی انتخابات کے دوسرے مرحلے کے ووٹ سے قبل کیا گیا ہے، جس کا مقصد عوام پر مہنگائی اور اخراجاتِ زندگی کے دباؤ کو کم کرنا ہے۔
وزیرِ خزانہ داریو دوریگان نے ایک پریس کانفرنس میں ان الزامات کو مسترد کر دیا کہ یہ اقدامات انتخابی مہم سے منسلک ہیں،انھوں نے کہا کہ ایران کے خلاف امریکا اور اسرائیل کی جنگ شروع ہونے کے بعد سے ایندھن سے متعلق ریلیف کے اقدامات باقاعدگی سے اعلان کیے جاتے رہے ہیں۔
گزشتہ اقدامات کی مدت جمعہ کے روز ختم ہو گئی ہے، جب کہ نئے امدادی پیکیج پر فوری طور پر عمل درآمد شروع ہو گیا ہے، ایتھنول پر پی آئی ایس/پاسپ اور کوفنز ٹیکسوں میں فی لیٹر 0.19 ریئس کی کمی کی مدت میں بھی توسیع کر دی گئی ہے۔
یہ بھی پڑھیں:سعودیہ میں مقیم غیر ملکیوں کی سنی گئی!بڑا اعلان سامنے آگیا
سڑکوں پر استعمال ہونے والے ڈیزل کے درآمد کنندگان کو 30 دن کے لیے فی لیٹر مزید 1.40 ریئس کی سبسڈی دی جائے گی،یہ سبسڈی پہلے سے موجود فی لیٹر 2.12 ریئس کی امداد کے علاوہ ہوگی۔
حکومت کا اندازہ ہے کہ گیسولین اور ایتھنول سے متعلق اقدامات پر 2026 میں 3.6 ارب ریئس لاگت آئے گی، جب کہ درآمد شدہ ڈیزل کے لیے اضافی سبسڈی پر 30 دن کے دوران 1.6 ارب ریئس خرچ ہونے کی توقع ہے۔
