شاہ فہد ایئرپورٹ اور آئل تنصیب پر حملوں میں تین افراد جاں بحق، پاکستانی سمیت 10 زخمی

ریاض: سعودی حکام کے مطابق سعودی عرب کے مشرقی صوبے میں دمام کے شاہ فہد انٹرنیشنل ایئرپورٹ اور آرامکو کی شیبہ آئل فیلڈ پر بدھ کو الگ الگ حملوں کے نتیجے میں تین افراد جاں بحق اور 10 زخمی ہوئے، جن میں ایک پاکستانی شہری بھی شامل ہے۔
سعودی وزارت توانائی نے بتایا کہ شیبہ آئل فیلڈ کی پروسیسنگ تنصیب کو نشانہ بنانے والے ڈرون کو مار گرانے کے بعد گرنے والے ملبے سے دو افراد جاں بحق اور دو زخمی ہوئے۔ جاں بحق افراد میں ایک فلپائنی اور ایک نیپالی شہری شامل ہیں، جبکہ زخمیوں میں ایک پاکستانی اور ایک انڈین شہری شامل ہیں۔
سعودی جنرل اتھارٹی آف سول ایوی ایشن کے مطابق دمام کے شاہ فہد ایئرپورٹ پر ہونے والے حملے میں ایک شخص جاں بحق اور آٹھ افراد زخمی ہوئے، جبکہ ایئرپورٹ کو مادی نقصان بھی پہنچا۔
حالیہ دنوں میں یمن کے حوثیوں نے سعودی عرب کے ایئرپورٹس، شہری علاقوں اور تیل کی تنصیبات کو متعدد حملوں کا نشانہ بنایا ہے۔ ریاض کے کنگ خالد انٹرنیشنل ایئرپورٹ پر سابقہ حملے کے بعد اسے 10 اکتوبر سے بند رکھا گیا تھا۔
اس صورتِ حال میں امریکی محکمہ خارجہ نے سعودی عرب میں اپنے سفارت خانے اور قونصل خانوں کے غیر ضروری عملے اور ان کے اہلِ خانہ کو ملک چھوڑنے کا حکم دے دیا ہے۔