سوڈان: نیالا کے بازار پر فوجی ڈرون حملے میں 100 سے زائد شہری ہلاک

خرطوم: سوڈان کے صوبے جنوبی دارفور کے دارالحکومت نیالا کے ایک مصروف بازار پر سوڈانی فوج کے ڈرون حملے میں 100 سے زائد شہری ہلاک اور 113 زخمی ہو گئے ہیں۔ مقامی انسانی حقوق تنظیم "ایمرجنسی لائرز” کے مطابق یہ واقعہ پیر کی شام شہر کے دومایا محلے میں واقع تانقونگ مارکیٹ میں پیش آیا۔
حملے سے مارکیٹ کا پورا علاقہ ملبے کا ڈھیر بن گیا۔ ہلاک اور زخمی ہونے والوں میں اکثریت خواتین اور بچوں کی ہے۔ "ڈاکٹرز ود آؤٹ بارڈرز” نے تصدیق کی کہ ان کے اسپتال میں درجنوں لاشیں لائی گئی ہیں اور تقریباً 150 زخمیوں کا علاج جاری ہے۔ نیالا پر اس وقت نیم فوجی دستے ریپڈ سپورٹ فورسز (آر ایس ایف) کا کنٹرول ہے، جس کی بنا پر فوج نے اس علاقے کو نشانہ بنایا، تاہم حملہ ایک سویلین مارکیٹ پر ہوا جہاں لوگ خریداری اور کاروبار میں مصروف تھے۔
سوڈان کی خانہ جنگی میں فوج اور آر ایس ایف دونوں کی جانب سے ڈرون حملوں میں تیزی آئی ہے۔ اقوامِ متحدہ کی حالیہ رپورٹ کے مطابق اکتوبر 2026 کے ابتدائی تین ہفتوں میں ہی ڈرون حملوں میں 300 سے زائد شہری مارے جا چکے ہیں۔ گزشتہ ہفتے متنازع سرحدی علاقے ابیئی میں بھی ایک بازار پر ڈرون حملے میں 150 سے زائد افراد ہلاک ہوئے تھے۔ انسانی حقوق کی تنظیموں نے حملے کی شدید مذمت کرتے ہوئے شہریوں کو نشانہ بنانے کے اس واقعے کی آزادانہ بین الاقوامی تحقیقات کا مطالبہ کیا ہے۔