آن لائن بدسلوکی کے لیے کوئی جواز نہیں

اسلام آباد میں تعینات خواتین سفراء نے صنفی بنیاد پر تشدد کے خلاف جاری 16 روزہ مہم کے سلسلے میں منعقدہ تقریب میں شرکت کی، جہاں آن لائن ہراسانی اور ڈیجیٹل تشدد کے بڑھتے ہوئے رجحان پر تشویش کا اظہار کیا گیا۔
تقریب سے خطاب میں مقررین کا کہنا تھا کہ آن لائن بدسلوکی خواتین اور لڑکیوں کو ڈیجیٹل دنیا میں محفوظ ماحول سے محروم کر رہی ہے، جس کے باعث وہ اظہارِ رائے، پیشہ ورانہ مواقع اور سماجی شمولیت سے دور ہوتی جا رہی ہیں۔
شرکاء نے اس بات پر زور دیا کہ ڈیجیٹل دنیا کو خوف اور ہراسانی نہیں، بلکہ مواقع، احترام اور تحفظ کی جگہ ہونا چاہیے۔ خواتین سفراء نے عالمی سطح پر اس مسئلے کے خلاف مشترکہ کاوشوں کی ضرورت پر بھی زور دیا۔