(ویب ڈیسک) اطالیہ (اٹلی) کے جزیرے سسلی کے ساحل پر واقع سٹرومبولی نامی آتش فشان جزیرے کی الگ تھلگ آبادی ’گینوسٹرا‘ میں یورپ کا سب سے چھوٹا پرائمری سکول قائم کر دیا گیا ہے جو صرف ایک 6 سالہ طالب علم کو تعلیم فراہم کرے گا۔
ایک کلاس روم پر مشتمل یہ سکول 10 ستمبر کو چرچ کی ملکیتی عمارت میں کھلے گا جس کے ساتھ ہی اس الگ تھلگ علاقے میں دو دہائیوں سے بند مقامی تعلیمی نظام دوبارہ فعال ہو جائے گا۔
یہ سکول 6 سالہ عائشہ (Aysha) کے لیے اس کے والدین کی جدوجہد اور کوششوں کے بعد دوبارہ قائم کیا گیا ہے جو نقل مکانی کرنے یا اپنی بیٹی کو پڑوسی جزیرے ‘لیپاری’ (Lipari) کے سکول بھیجنے سے بچنا چاہتے تھے۔
سمندر کے راستے سے قابلِ رسائی گینوسٹرا کی سردیوں میں آبادی تقریباً 40 افراد پر مشتمل ہوتی ہے، یہاں مقامی فیری سروس خراب موسم اور سمندری طغیانی کے باعث اکثر متاثر رہتی ہے جس سے آمدورفت میں شدید مشکلات پیش آتی ہیں۔
مقامی حکام اور پادریوں نے اس اقدام کو الگ تھلگ کمیونٹیز کے بنیادی تعلیمی حقوق کی فراہمی کا عہد قرار دیا ہے اور ان کا ماننا ہے کہ یہ کلاس روم اس علاقے کی طویل المدتی بقا کے لیے ایک اہم مرکز ثابت ہو گا۔
