(ویب ڈیسک)گھر سے باہر سفر کے دوران یا کسی ایسی جگہ جہاں وائی فائی دستیاب نہ ہو، اسمارٹ فون کو موبائل ہاٹ اسپاٹ کے طور پر استعمال کرکے لیپ ٹاپ، ٹیبلیٹ اور دیگر ڈیوائسز کو انٹرنیٹ سے منسلک کیا جاسکتا ہے۔
اس کے لیے فون میں موبائل ڈیٹا، مثلاً 4جی یا 5جی کنکشن موجود ہونا ضروری ہے،اس کے بعد اسمارٹ فون ایک چھوٹے وائرلیس راؤٹر کی طرح کام کرتا ہے، لیکن سوال یہ ہے کہ کیا موبائل ہاٹ اسپاٹ استعمال کرنا محفوظ ہے؟
عام طور پر اپنے موبائل ہاٹ اسپاٹ کا استعمال کسی غیر محفوظ پبلک وائی فائی نیٹ ورک سے زیادہ محفوظ سمجھا جاتا ہے کیونکہ ہاٹ اسپاٹ پر کنٹرول خود صارف کے پاس ہوتا ہے۔
پبلک وائی فائی استعمال کرتے ہوئے یہ معلوم کرنا مشکل ہوسکتا ہے کہ نیٹ ورک کتنا محفوظ ہے اور اس سے کون لوگ منسلک ہیں،غیر محفوظ نیٹ ورک پر حساس معلومات بھی خطرے میں پڑ سکتی ہیں،اس کے برعکس موبائل ہاٹ اسپاٹ میں صارف خود پاس ورڈ مقرر کرتا ہے اور یہ فیصلہ بھی کرسکتا ہے کہ کون سی ڈیوائس اس سے منسلک ہوگی۔
موبائل ہاٹ اسپاٹ اس وقت زیادہ خطرناک ہوسکتا ہے جب اس کا پاس ورڈ بہت آسان ہو یا اسے بالکل ہٹا دیا جائے، اگر ہاٹ اسپاٹ بغیر پاس ورڈ کے دستیاب ہو تو آس پاس موجود کوئی بھی شخص اس سے منسلک ہوسکتا ہے، اس صورت میں غیر ضروری افراد کو آپ کے انٹرنیٹ کنکشن تک رسائی مل سکتی ہے اور نیٹ ورک کے استعمال کے ساتھ سکیورٹی خطرات بھی بڑھ سکتے ہیں،اسی لیے ہاٹ اسپاٹ کے لیے مضبوط اور منفرد پاس ورڈ استعمال کرنا بہتر ہے۔
آئی فون اور اینڈرائیڈ دونوں میں موبائل ہاٹ اسپاٹ کو پاس ورڈ کے ذریعے محفوظ کیا جاسکتا ہے، بعض اینڈرائیڈ ڈیوائسز میں پاس ورڈ ہٹانے یا سکیورٹی کی دیگر ترتیبات تبدیل کرنے کے آپشنز بھی موجود ہوتے ہیں، اگر ہاٹ اسپاٹ کو بغیر پاس ورڈ کے استعمال کیا جائے تو صارف کے پاس یہ کنٹرول نہیں رہتا کہ کون اس سے منسلک ہوسکتا ہے۔
یہ بھی پڑھیں: پنجاب:دفعہ 144کے تحت ڈرون اڑانے پر پابندی،نوٹیفکیشن جاری
موبائل ہاٹ اسپاٹ میں عام طور پر وائی فائی سکیورٹی پروٹوکولز استعمال ہوتے ہیں، جن میں WPA بھی شامل ہے، یہ پروٹوکول وائرلیس کنکشن کو محفوظ بنانے اور ڈیٹا کو انکرپٹ کرنے میں مدد دیتے ہیں، اس لیے موبائل ہاٹ اسپاٹ استعمال کرتے وقت مضبوط پاس ورڈ رکھنا، غیر ضروری کنکشن ختم کرنا اور ہاٹ اسپاٹ کو ضرورت نہ ہونے پر بند رکھنا سکیورٹی کے لیے بہتر اقدامات ہیں۔
مضبوط پاس ورڈ استعمال کریں،ہاٹ اسپاٹ کو بغیر پاس ورڈ کے استعمال نہ کریں،صرف اپنی قابل اعتماد ڈیوائسز کو کنیکٹ کریں،ضرورت ختم ہونے کے بعد ہاٹ اسپاٹ بند کردیں،حساس اکاؤنٹس استعمال کرتے وقت غیر محفوظ نیٹ ورک سے گریز کریں۔
مختصراً موبائل ہاٹ اسپاٹ خود کوئی خطرناک چیز نہیں، لیکن اس کی سکیورٹی بڑی حد تک اس بات پر منحصر ہے کہ صارف اسے کس طرح ترتیب دیتا اور استعمال کرتا ہے۔
