کرسٹیانو رونالڈو نے تصدیق کی ہے کہ وہ ڈنمارک کے خلاف میچ سے ایک روز قبل پرتگال کی قومی ٹیم کے کیمپ سے الگ ہوگئے ہیں، جبکہ کوچ جارج جیسس کے ساتھ ان کے اختلافات کی اطلاعات سامنے آئی ہیں۔
اتوار کو ناروے کے خلاف پرتگال کی فتح کے میچ میں رونالڈو نے شرکت نہیں کی، حالانکہ جارج جیسس نے انہیں بتایا تھا کہ وہ متبادل کھلاڑی کے طور پر میدان میں اتریں گے۔
41 سالہ رونالڈو اب کوپن ہیگن میں ہونے والے نیشنز لیگ کے میچ سے قبل ٹیم کے کیمپ سے الگ ہوگئے ہیں، جس کے بعد قومی ٹیم میں ان کا مستقبل غیر یقینی ہوگیا ہے۔
انڈپینڈنٹ اردو کا واٹس ایپ گروپ یہاں جوائن کریں
رونالڈو نے سوشل میڈیا پر لکھا، ’قومی ٹیم کی پریس کانفرنس کے بعد اور پرتگالی فٹبال فیڈریشن کے صدر سے گفتگو کے بعد میں نے قومی ٹیم کے کیمپ سے الگ ہونے کا فیصلہ کیا ہے۔
’وقت آنے پر میں تمام پرتگالی عوام کو ان وجوہات کے بارے میں سچ بتاؤں گا جن کی وجہ سے میں نے قومی ٹیم چھوڑنے کا فیصلہ کیا، جس کے لیے میں نے ہمیشہ خود کو وقف رکھا۔ فی الحال پرتگال اور اپنے تمام ساتھی کھلاڑیوں کے لیے، بغیر کسی استثنیٰ کے، نیک خواہشات کا اظہار کرنا چاہتا ہوں۔‘
رونالڈو نے 2003 میں بین الاقوامی ڈیبیو کے بعد سے پرتگال کی جانب سے 234 میچوں میں ریکارڈ 146 گول کیے ہیں۔ انہوں نے گذشتہ ہفتے ویلز کے خلاف میچ میں بھی ابتدائی گیارہ کھلاڑیوں میں شامل ہو کر کھیل کا آغاز کیا تھا۔
تجربہ کار فارورڈ مجموعی طور پر سینئر فٹبال میں 1000 گول مکمل کرنے کے قریب ہیں۔ وہ رواں سال چھ ورلڈ کپ میں گول کرنے والے پہلے مرد فٹبالر بھی بن گئے تھے۔
اس سیکشن میں متعلقہ حوالہ پوائنٹس شامل ہیں (Related Nodes field)
ڈنمارک کے خلاف میچ سے قبل جارج جیسس نے اپنے اور رونالڈو کے درمیان اختلافات کی اطلاعات کو مسترد کرتے ہوئے کہا کہ وہ رونالڈو کے ساتھ بھی دوسرے کھلاڑیوں جیسا ہی برتاؤ کریں گے۔
جیسس نے کہا،’مجھے نہیں معلوم کہ میچ میں کیا ہوگا۔ اگر ہمیں کسی مرحلے پر رونالڈو کی ضرورت ہوئی تو وہ کھیلیں گے، اور اگر ضرورت نہ ہوئی تو نہیں کھیلیں گے۔
’ایسا لگتا ہے کہ ہمارے درمیان کوئی مسئلہ تھا، لیکن کوئی مسئلہ نہیں تھا۔ فیصلے میں کرتا ہوں اور سب جانتے ہیں کہ ایسا ہی ہے۔ ‘
’ میں جو چاہوں وعدہ کرسکتا ہوں، میں کوچ ہوں۔ کوئی بھی کھلاڑی میرے لیے فیصلہ نہیں کرے گا۔‘
رونالڈو اور جارج جیسس اس سے قبل سعودی کلب النصر میں بھی ایک ساتھ کام کر چکے ہیں، جہاں رونالڈو 2023 سے کلب فٹبال کھیل رہے ہیں۔
