وزیراعظم شہباز شریف کی انطالیہ میں صدر اردوان سے ملاقات، تجارت، دفاع اور توانائی میں تعاون پر زور


انطالیہ (12 نومبر) — وزیراعظم محمد شہباز شریف نے اقوام متحدہ کے ماحولیاتی تبدیلی کے فریم ورک کنونشن (UNFCCC) کے تحت کوپ 31 سربراہی اجلاس کے موقع پر ترکیہ کے صدر رجب طیب اردوان سے دوطرفہ ملاقات کی۔
دونوں رہنماؤں نے پاکستان اور ترکیہ کے گہرے، تاریخی اور برادرانہ تعلقات کا اعادہ کرتے ہوئے ان کے مثبت سمت میں آگے بڑھنے پر اطمینان کا اظہار کیا۔
ملاقات میں تجارت و سرمایہ کاری، دفاعی تعاون، توانائی کے شعبے میں اشتراک اور علاقائی روابط کے فروغ پر تفصیلی بات چیت ہوئی۔ دونوں رہنماؤں نے جاری اقدامات پر عملدرآمد تیز کرنے اور اقتصادی تعلقات کو مستحکم بنانے کے لیے نئے مواقع تلاش کرنے پر زور دیا۔ خطے کی بدلتی صورتحال اور عالمی پیش رفت پر بھی تبادلہ خیال کیا گیا۔
وزیراعظم نے کشیدگی کم کرنے اور مذاکرات کو فروغ دینے کے لیے علاقائی ممالک، بالخصوص معاہدہ مکہ کے رکن ممالک کی کوششوں کو اجاگر کیا۔ صدر اردوان نے پاکستان کے تعمیری کردار اور ان سفارتی کوششوں کو سراہا جن کے نتیجے میں اسلام آباد مفاہمتی یادداشت پر دستخط ہوئے۔ شہباز شریف نے پاکستان کی سفارتی کوششوں کے دوران مستقل حمایت اور قریبی رابطہ کاری پر صدر اردوان کا شکریہ ادا کیا۔
دونوں رہنماؤں نے خطے میں پائیدار اور دیرپا امن کے لیے اسلام آباد مفاہمتی یادداشت کے تحت تمام فریقین کی جانب سے اپنے وعدوں اور ذمہ داریوں کی پاسداری کی اہمیت پر زور دیا۔
رہنماؤں نے قومی مفاد کے بنیادی امور پر ایک دوسرے کی غیر متزلزل حمایت کا اعادہ کیا اور باہمی اعتماد و یکجہتی کی دیرینہ روایت کو سراہا۔ انہوں نے برادرانہ تعلقات اور امن و خوشحالی کے مشترکہ وژن کی بنیاد پر اسٹریٹجک شراکت داری کو مزید مضبوط بنانے کے عزم کا بھی اعادہ کیا۔

متعلقہ پوسٹ