امریکی کارکنوں نے آئی سی سی سے ٹرمپ اور روبیو کے خلاف تحقیق اور گرفتاری وارنٹ کا مطالبہ کیا

دی ہیگ: امریکہ کے ایک شہری گروپ اور بین الاقوامی انسانی حقوق کے وکلاء نے بین الاقوامی فوجداری عدالت (آئی سی سی) سے صدر ڈونلڈ ٹرمپ، وزیر خارجہ مارکو روبیو اور دیگر اعلیٰ امریکی حکام کے خلاف تحقیق کرنے اور ان کے خلاف گرفتاری وارنٹ جاری کرنے کا مطالبہ کیا ہے۔
ٹیکس پیئر الائنس اگینسٹ جینوسائیڈ (TAAG) نے بدھ کے روز دی ہیگ میں آئی سی سی کے پراسیکیوٹر کے دفتر میں ثبوت پیش کیے۔ گروپ نے الزام عائد کیا ہے کہ امریکی حکام نے غزہ میں اسرائیل کی جانب سے مبینہ نسل کشی، جنگی جرائم اور انسانیت کے خلاف جرائم میں مدد اور اعانت فراہم کی۔
TAAG کے مطابق جمع کرائے گئے ثبوتوں میں غزہ میں خدمات انجام دینے والے ڈاکٹروں کے حلف نامے، عینی شاہدین کے بیانات، وسل بلوئر کی گواہیاں، ویڈیو شواہد اور اسرائیل کو امریکی فوجی، مالی، سفارتی اور سیاسی حمایت سے متعلق دستاویزات شامل ہ
فائل میں امریکی ٹراما سرجن ڈاکٹر فیروز سدھوا، جنہوں نے غزہ میں دو بار خدمات انجام دیں، اور غزہ ہیومنٹیرین فاؤنڈیشن کے سابق مینیجر ڈیوڈ میکنتوش کی گواہیاں بھی شامل ہیں۔
گروپ نے آئی سی سی پراسیکیوٹر سے کہا ہے کہ وہ اس بات کی تحقیق کرے کہ کیا ٹرمپ اور روبیو نے اسرائیل کو ہتھیار، مالی امداد، سفارتی تحفظ اور سیاسی حمایت فراہم کر کے غزہ میں بین الاقوامی جرائم میں معاونت کی۔
تاہم آئی سی سی نے اس درخواست پر ابھی کوئی فیصلہ نہیں دیا۔ پراسیکیوٹر کو شکایت جمع کرانا اس بات کی ضمانت نہیں کہ عدالت تحقیق شروع کرے گی یا وارنٹ جاری کرے گی۔ امریکہ روم اسٹیٹیوٹ کا فریق نہیں اور وہ امریکی شہریوں پر آئی سی سی کے دائرہ اختیار کو مسترد کرتا ہے۔
اقوام متحدہ کی خصوصی نمائندہ فرانسسکا البانیز نے دی ہیگ میں کہا کہ بین الاقوامی قانون انصاف کا آخری پرامن ذریعہ ہے، مگر اسے استعمال کرنے کے لیے سیاسی جرأت درکار ہے۔
واضح رہے کہ نومبر 2024 میں آئی سی سی نے اسرائیلی وزیراعظم بنیامین نیتن یاہو اور سابق وزیردفاع یوآو گالنٹ کے خلاف گرفتاری وارنٹ جاری کیے تھے، جبکہ اس نئی درخواست کا تعلق امریکی حکام کی مبینہ معاونت سے ہے۔