ایران جنگ پر ٹرمپ اور نیتن یاہو میں شدید اختلاف کی رپورٹس، اسرائیلی وزیر اعظم دفتر کی تردید

واشنگٹن (ایجنسی): اسرائیلی ذرائع ابلاغ نے انکشاف کیا ہے کہ امریکی صدر ڈونالڈ ٹرمپ اور اسرائیلی وزیر اعظم بنجامن نیتن یاہو کے درمیان گزشتہ ہفتے کے اختتام پر ہونے والی ٹیلی فونک گفتگو میں ایران کے خلاف جنگ کے مستقبل پر شدید اختلافات سامنے آئے۔
اسرائیلی اخبار یدیعوت احرونوت اور اس کی ویب سائٹ وائے نیٹ کے مطابق نیتن یاہو نے بار بار جنگ دوبارہ شروع کرنے پر زور دیا، جبکہ ٹرمپ اس موقف پر قائم رہے کہ سفارتی راستے کو موقع دیا جائے اور ایران کے ساتھ جاری مذاکرات کو آگے بڑھنے دیا جائے۔ باخبر ذرائع کے حوالے سے بتایا گیا کہ کال نے شدید تصادم کی شکل اختیار کر لی اور اسے ’جہنم جیسی چیخ و پکار‘ والی تکرار قرار دیا گیا۔
دوسری جانب اسرائیلی وزیر اعظم کے دفتر نے ان رپورٹس کو بے بنیاد قرار دے کر مسترد کر دیا۔ ایک اعلیٰ اسرائیلی عہدیدار نے تصدیق کی کہ ہفتے کے اختتام پر دونوں رہنماؤں کا رابطہ ہوا تھا، تاہم ان کے مطابق کوئی تکرار نہیں ہوئی۔
یہ پہلا موقع نہیں کہ جنگ کے مستقبل پر دونوں رہنماؤں میں کشیدگی سامنے آئی ہو۔ گزشتہ جون میں بھی ایسی ہی کشیدگی دیکھی گئی تھی۔ ٹرمپ اس سے قبل نیویارک پوسٹ کو بتا چکے ہیں کہ انہوں نے ایک کال کے دوران نیتن یاہو کو واقعی پاگل قرار دیا تھا۔ حالیہ رپورٹس فائنانشل ٹائمس کی اس رپورٹ کے چند دن بعد آئیں جس میں کہا گیا تھا کہ نیتن یاہو روزانہ ٹرمپ کو فون کر کے ایران کے خلاف مکمل جنگ دوبارہ شروع کرنے پر آمادہ کر رہے تھے۔
نیتن یاہو کا اصرار ہے کہ ایران پر امریکی فوجی حملے دوبارہ شروع کیے جائیں اور تہران میں حکومت کی تبدیلی کی کوشش کی جائے۔ یہ ایسے وقت میں ہے جب اکتوبر کے عام انتخابات میں نشستیں کھونے کے بعد ان کے سیاسی مستقبل پر دباؤ ہے۔ منگل کو اسرائیلی کنیسٹ میں انہوں نے کہا کہ ایرانی حکومت کی تبدیلی ہی ’دہشت گردی کی حکمرانی‘ کو ختم کرنے اور ایران کا جوہری پروگرام روکنے کا واحد راستہ ہے۔
ٹرمپ اب تک فوجی تصادم کی طرف واپسی سے گریز کر رہے ہیں اور معاشی دباؤ کی مہم جاری رکھنے کو ترجیح دیتے ہیں تاکہ ایران رعایتیں دینے پر مجبور ہو، جبکہ واشنگٹن اور تہران کے درمیان سفارتی کوششیں بھی جاری ہیں۔ اتوار کو نشر ہونے والے ’۶۰ منٹس‘ کے انٹرویو میں ٹرمپ نے کہا کہ ان کے خیال میں فی الحال جنگ دوبارہ شروع کرنے کی کوئی وجہ نہیں۔ یہ اختلافات ایسے وقت سامنے آئے ہیں جب ایران آبنائے ہرمز عبور کرنے کی کوشش کرنے والے جہازوں کو نشانہ بنا رہا ہے اور رپورٹس کے مطابق جنگ کے دوران بحری حملے بے مثال سطح تک پہنچ چکے ہیں۔