gazapeace


نیویارک، 18 نومبر — امریکہ کی سرپرستی میں قائم بورڈ آف پیس نے اقوام متحدہ کی سلامتی کونسل کو خبردار کیا ہے کہ اسرائیل اور حماس کی جانب سے جنگ بندی معاہدے پر مکمل عملدرآمد نہ ہونے، مسلسل فوجی کارروائیوں اور انسانی امداد کی راہ میں رکاوٹوں کے باعث غزہ میں قائم جنگ بندی خطرے میں ہے۔ بورڈ نے کہا کہ اگر فوری اقدامات نہ ہوئے تو جنگ بندی ختم ہو سکتی ہے۔
بورڈ آف پیس نے سلامتی کونسل کو پیش کی گئی اپنی پہلی سالانہ رپورٹ میں کہا کہ معاہدے میں کیے گئے وعدوں اور زمینی صورتِ حال کے درمیان بڑھتا فرق امن عمل کے لیے سب سے بڑا خطرہ بن چکا ہے۔ رپورٹ کے مطابق غزہ میں اسرائیلی فضائی حملے جاری ہیں، جبکہ حماس کی فوجی سرگرمیاں بھی جنگ بندی کے طے شدہ لائحہ عمل پر عملدرآمد میں رکاوٹ بن رہی ہیں۔
بورڈ نے دونوں فریقوں سے اپنے وعدے پورے کرنے کا مطالبہ کیا، تاہم اسرائیل کی جانب سے امدادی سامان اور ضروری آلات کی آمد پر عائد پابندیوں کو خاص طور پر نمایاں کیا۔ رپورٹ میں کہا گیا کہ فنڈز کی کمی نے امدادی سرگرمیوں اور موسمِ سرما کی تیاریوں کو مزید مشکل بنا دیا ہے۔
غزہ کی تباہ شدہ عمارتوں اور خیموں میں پناہ لینے والے فلسطینی ایک اور سرد موسم کا سامنا کرنے جا رہے ہیں۔ رپورٹ کے مطابق متاثرہ آبادی کو پناہ گاہوں کے سامان، سردی سے بچاؤ کی اشیا، جنریٹرز، پانی کے پمپ اور ملبہ ہٹانے والی بھاری مشینری کی فوری ضرورت ہے۔ بورڈ نے امداد اور تعمیرِ نو کے لیے پہلے سے کیے گئے مالی وعدوں کی رقم جلد جاری کرنے پر بھی زور دیا۔
امن منصوبے کے تحت غزہ کے انتظام کے لیے ایک عارضی فلسطینی ٹیکنوکریٹک انتظامیہ کے قیام کا منصوبہ ہے، جسے روزمرہ شہری معاملات چلانے کی ذمہ داری سونپی جانی ہے۔ تاہم بورڈ کے مطابق اسرائیل نے اس انتظامیہ کو غزہ میں کام شروع کرنے کے لیے درکار منظوری نہیں دی۔ شہری پولیس کی تربیت اور تعیناتی میں تاخیر بھی عبوری انتظامیہ کے قیام اور بین الاقوامی استحکامی فورس کی تعیناتی کو متاثر کر رہی ہے۔
بورڈ نے سلامتی کونسل سے اپیل کی کہ وہ معاہدے پر عملدرآمد کے لیے اپنا اثر و رسوخ استعمال کرے اور غزہ میں انسانی امداد، تجارتی سامان اور انتظامی ڈھانچے کی بحالی کی راہ ہموار کرے۔ رپورٹ میں واضح کیا گیا کہ اسرائیل یا حماس میں سے کوئی بھی فریق دوسرے کی تاخیر کو اپنی ذمہ داریاں پوری نہ کرنے کا جواز نہیں بنا سکتا۔
بورڈ کے مطابق جنگ بندی ٹوٹنے کی صورت میں نہ صرف امن کا موجودہ لائحہ عمل ختم ہو جائے گا بلکہ غزہ میں نئی انتظامیہ کے قیام اور بڑے پیمانے پر تعمیرِ نو کے امکانات بھی شدید متاثر ہوں گے۔
واضح رہے کہ اسرائیل اور حماس کے درمیان جنگ بندی 10 اکتوبر 2025ء کو امریکہ، مصر، قطر اور ترکیہ کی ثالثی کے بعد نافذ ہوئی تھی۔ اس معاہدے میں جنگ کے خاتمے، قیدیوں کے تبادلے، انسانی امداد کی فراہمی اور غزہ کے مستقبل کے انتظامات شامل تھے۔ امریکی صدر ڈونالڈ ٹرمپ کے 20 نکاتی امن منصوبے کے تحت قائم بورڈ آف پیس کو جنگ بندی کی نگرانی اور غزہ کی تعمیرِ نو میں کردار ادا کرنا ہے۔

متعلقہ پوسٹ