ملائیشیا: آئندہ سال سے ہندوستانیوں کے لیے بلا ویزا داخلہ ختم

malaysia 201126 d


کوالالمپور: ملائیشیا نے اعلان کیا ہے کہ ہندوستانی شہریوں کے لیے ۳۰ روزہ بلا ویزا داخلے کی سہولت ۳۱ دسمبر ۲۰۲۶ء کو ختم ہو جائے گی۔ یکم جنوری ۲۰۲۷ء سے ملک میں داخل ہونے والے تمام ہندوستانی پاسپورٹ ہولڈرز کو اپنی آمد سے قبل درست ویزا حاصل کرنا لازمی ہوگا۔
ملائیشیا کے امیگریشن ڈیپارٹمنٹ نے ۱۷ نومبر کو جاری اطلاع میں کہا کہ ہندوستانیوں کے لیے ویزا استثنیٰ یکم جنوری ۲۰۲۷ء سے دستیاب نہیں رہے گا۔ ویزا کی درخواستیں یکم دسمبر ۲۰۲۶ء سے ملک کے سرکاری MyVISA پورٹل کے ذریعے جمع کرائی جا سکیں گی، جس سے مسافروں کو نئے ضابطے نافذ ہونے سے قبل ایک ماہ کی تیاری کا وقت ملے گا۔
ملائیشیا نے ۲۰۲۳ء میں ہندوستانی شہریوں کو ۳۰ روزہ ویزا استثنیٰ دیا تھا، جس کے تحت انہیں آمد سے تین دن قبل صرف ملائیشیا ڈیجیٹل ارائیول کارڈ کے لیے رجسٹر ہونا ضروری تھا۔ یہ سہولت ۲۰۲۶ء تک بڑھائی گئی تھی، تاہم اب امیگریشن ڈیپارٹمنٹ نے ہندوستان کو ان ممالک کی فہرست میں شامل کیا ہے جن کے شہریوں کو ملک میں داخلے سے پہلے ویزا درکار ہوگا۔
محکمہ نے کہا کہ درخواست کے نتیجے یا سفر کے منصوبوں میں کسی تبدیلی سے قطع نظر ویزا پروسیسنگ فیس ناقابل واپسی ہوگی۔ سیاحوں کو مشورہ دیا گیا ہے کہ وہ ملائیشیا میں اپنے پورے قیام کا احاطہ کرنے والی طبی انشورنس رکھیں، کیونکہ غیر رہائشیوں کو طبی علاج اور دیگر صحت کی خدمات کے تمام اخراجات خود برداشت کرنے ہوں گے۔
یاد رہے کہ ستمبر میں کوالالمپور میں ہندوستانی ہائی کمیشن نے ہندوستانی شہریوں کو خبردار کیا تھا کہ وہ ۳۰ روزہ بلا ویزا سہولت کے تحت ملائیشیا میں ملازمت تلاش نہ کریں۔ ہائی کمیشن کے مطابق کچھ افراد جھوٹے ملازمتی وعدوں کے شکار ہو کر زیادہ قیام، غیر قانونی حیثیت، استحصال، حراست اور قانونی کارروائی کا سامنا کر سکتے ہیں۔
ہائی کمیشن نے واضح کیا کہ بلا ویزا داخلے کی سہولت صرف سیاحت اور سماجی دوروں کے لیے ۳۰ دن تک قیام کی اجازت دیتی ہے، جبکہ اس کے تحت ملازمت اختیار کرنا امیگریشن قوانین کی واضح خلاف ورزی ہے۔ ملازمت کے ارادے سے جانے والوں کو درست ورک پرمٹ یا ویزا ود رفرنس (VDR) حاصل کرنا ہوگا۔

متعلقہ پوسٹ