وزیر داخلہ محسن نقوی سے امریکی قائم مقام سفیر نیٹلی بیکر کی ملاقات، دوطرفہ تعاون بڑھانے پر اتفاق

اسلام آباد : وفاقی وزیر داخلہ محسن نقوی سے امریکہ کی قائم مقام سفیر نیٹلی بیکر نے ملاقات کی جس میں پاکستان اور امریکہ کے دوطرفہ تعلقات، بارڈر سیکیورٹی، انسداد منشیات، کوسٹ گارڈز اور فرانزک کے شعبوں میں تعاون بڑھانے پر تفصیلی تبادلہ خیال کیا گیا۔

ملاقات کے دوران امریکہ میں مطلوب پاکستانی شہریوں کے حوالے سے بھی بات چیت ہوئی جبکہ نیٹلی بیکر نے خیبرپختونخوا اور پنجاب میں حالیہ سیلاب سے ہونے والے جانی و مالی نقصان پر گہرے دکھ اور افسوس کا اظہار کیا۔

وزیر داخلہ محسن نقوی نے کہا کہ امریکی صدر ٹرمپ کی جانب سے پاکستان میں تیل کے ذخائر بڑھانے کے لیے مشترکہ کوششوں کا عندیہ خوش آئند ہے۔ انہوں نے مزید کہا کہ امریکی سرمایہ کار پاکستان میں تیل سمیت مختلف شعبوں میں سرمایہ کاری کر کے بھرپور فائدہ اٹھا سکتے ہیں اور حکومت پاکستان اس سلسلے میں انہیں ہر ممکن سہولت فراہم کرے گی۔

قائم مقام امریکی سفیر نیٹلی بیکر نے کہا کہ امریکہ پاکستان کے ساتھ تعلقات کو خصوصی اہمیت دیتا ہے اور دوطرفہ تعاون مزید بڑھانے کے لیے پرعزم ہے۔

ملاقات میں وفاقی سیکرٹری داخلہ محمد خرم آغا اور ایڈیشنل سیکرٹری داخلہ میجر جنرل نور ولی خان بھی موجود تھے