صدر آصف علی زرداری کا چین میں ہائی اسپیڈ ٹرین کا سفر

چینگدو: صدر مملکت آصف علی زرداری نے چین میں زلزلہ وارننگ سسٹم سے لیس جدید ہائی اسپیڈ ٹرین کے ذریعے سفر کیا۔ صدر نے چیگندو سے میان یانگ تک نصف گھنٹے کا سفر طے کیا۔
صدر مملکت کو ٹرین کے آپریشن، سروس اور سیفٹی سسٹمز پر تفصیلی بریفنگ دی گئی۔ اس موقع پر انہیں بتایا گیا کہ چین کے پاس دنیا کا سب سے بڑا ہائی اسپیڈ ریل نیٹ ورک ہے جو 45 ہزار کلومیٹر پر محیط ہے اور سالانہ دو ارب سے زائد مسافروں کو سفری سہولت فراہم کرتا ہے۔ چین کی ٹرینیں 350 کلومیٹر فی گھنٹہ تک کی رفتار سے چلتی ہیں اور یہ جدید کنیکٹیویٹی کی ایک مثالی مثال ہیں۔
صدر آصف زرداری نے آلودگی سے پاک الیکٹرک ٹرین اور زلزلہ وارننگ سسٹم کو انجینئرنگ کا شاہکار قرار دیتے ہوئے کہا کہ چین کی جدت پسندی پاکستان سمیت دنیا کے دیگر ممالک کے لیے سبق آموز ہے۔
اس موقع پر پاکستانی سفیر خلیل ہاشمی، چینی سفیر جیانگ زائی ڈونگ اور سینیٹر سلیم مانڈوی والا بھی صدر کے ہمراہ تھے۔ میان یانگ پہنچنے پر نائب میئر وُو ہاؤ نے صدر مملکت کا پُرتپاک استقبال کیا۔