عمران خان کی کوئی ضمانت دینے کو تیار نہیں، نواز شریف کردار ادا کریں: سعد رفیق

لاہور — پاکستان مسلم لیگ (ن) کے سینئر رہنما خواجہ سعد رفیق نے کہا ہے کہ عمران خان کی ضمانت دینے کو کوئی بھی تیار نہیں، ایسے میں سیاسی کشیدگی کم کرنے کے لیے نواز شریف کو آگے آ کر کردار ادا کرنا ہوگا۔
خطاب کرتے ہوئے سعد رفیق کا کہنا تھا کہ نواز شریف سب سے بڑے سیاسی رہنما ہیں اور موجودہ حالات میں انہیں بات کرنی پڑے گی تاکہ مخالفین پر دباؤ کم ہو اور سیاسی ماحول میں بہتری آئے۔ انہوں نے کہا کہ ملک کو اس وقت مفاہمت اور سیاسی بالغ نظری کی ضرورت ہے۔
سعد رفیق نے اپنے خطاب میں سوال اٹھاتے ہوئے کہا:
“کیا پاکستان کے سب وزیراعظم غدار تھے؟ کیا سب جج اور چیف محب وطن تھے؟”
ان کا کہنا تھا کہ تاریخ کو یک طرفہ بیانیے سے دیکھنے کے بجائے زمینی حقائق کو مدنظر رکھنا چاہیے۔
مسلم لیگ (ن) کے رہنما نے زور دیا کہ سیاست میں تلخی کم کیے بغیر نہ تو جمہوری عمل آگے بڑھ سکتا ہے اور نہ ہی معیشت اور اداروں پر اعتماد بحال ہو سکتا ہے۔ انہوں نے کہا کہ قومی مفاد میں تمام سیاسی قوتوں کو سنجیدگی سے بات چیت کا راستہ اختیار کرنا ہوگا۔