پاکستان کی اعلیٰ عسکری قیادت نے بدھ کو واضح کیا ہے کہ قومی یکجہتی، سلامتی اور استحکام کو نقصان پہنچانے کی کسی کو اجازت نہیں دی جائے گی، چاہے ایسے عناصر سیاسی ہوں یا غیر سیاسی۔
یہ بات فیلڈ مارشل سید عاصم منیر کی زیر صدارت ہونے والی کور کمانڈرز کانفرنس میں کہی گئی جس میں اندرونی و بیرونی سلامتی کی صورتحال کا جامع جائزہ لیا گیا۔
فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق کانفرنس کے شرکا نے واضح کیا کہ مسلح افواج اور پاکستانی عوام کے درمیان تفرقہ پیدا کرنے کی کسی بھی کوشش کو ہرگز برداشت نہیں کیا جائے گا۔
فورم نے دہشت گردی کے خلاف مادرِ وطن کے دفاع میں جانوں کا نذرانہ پیش کرنے والوں کو خراج عقیدت پیش کیا۔
چیف آف آرمی سٹاف اور چیف آف ڈیفنس فورسز نے پاکستان کی مسلح افواج کی غیر متزلزل جرات، پیشہ ورانہ مہارت اور قربانیوں کو سراہتے ہوئے ’حالیہ مہینوں میں ملک بھر میں انٹیلی جنس پر مبنی انسداد دہشت گردی کی کارروائیوں میں افواجِ پاکستان کی پرعزم کاوشوں‘ کی تعریف کی۔
کانفرنس میں اندرونی و بیرونی سلامتی کے تناظر میں درپیش خطرات اور آپریشنل تیاریوں پر زور دیا گیا، جبکہ اس بات کا اعادہ کیا گیا کہ ’انڈین سرپرستی میں کام کرنے والے تمام دہشت گردوں، ان کے سہولت کاروں اور معاونین کے ساتھ بلا امتیاز اور فیصلہ کن کارروائی کی جائے گی۔ فورم نے دہشت گردی، جرائم اور سیاسی مفادات کے درمیان کسی بھی قسم کے گٹھ جوڑ کو یکسر مسترد کر دیا۔‘
شرکا نے بلوچستان حکومت کے خصوصی ترقیاتی اقدامات کو سراہا، جن کا مقصد مقامی آبادی کو بااختیار بنانا اور سماجی روابط کے ذریعے گورننس سے جڑے دہشت گردی کے عوامل کا خاتمہ ہے۔ فورم نے پائیدار امن و استحکام کے لیے قومی ایکشن پلان کے تحت دیگر علاقوں میں بھی اسی طرز کے عوامی اقدامات کی ضرورت پر زور دیا۔
اس سیکشن میں متعلقہ حوالہ پوائنٹس شامل ہیں (Related Nodes field)
کانفرنس میں کشمیری عوام کے حقِ خود ارادیت اور ان کی جائز جدوجہد کے لیے پاکستان کی غیر متزلزل حمایت کا اعادہ کیا گیا، جبکہ مسئلہ فلسطین پر بھی پاکستان کے اصولی موقف کی توثیق کی گئی۔ فورم نے غزہ میں فوری اور مستقل جنگ بندی، بلا روک ٹوک انسانی امداد کی فراہمی اور فلسطینی ریاست کے قیام کے لیے ایک قابلِ اعتماد راستے کا مطالبہ کیا۔
قور کمانڈرز کانفرنس نے فلسطین کے مسئلے پر پاکستان کے اصولی موقف کی توثیق کرتے ہوئے غزہ میں فوری اور مستقل جنگ بندی کا مطالبہ کیا۔ فورم نے اس بات پر زور دیا کہ غزہ میں بلا رکاوٹ انسانی امداد کی فراہمی یقینی بنائی جائے اور فلسطینی عوام کے لیے ایک آزاد اور خودمختار ریاست کے قیام کی جانب قابلِ اعتماد اور واضح راستہ اختیار کیا جائے۔
کانفرنس کے اختتام پر فیلڈ مارشل سید عاصم منیر نے کمانڈرز کو آپریشنل تیاری، نظم و ضبط، تربیت، جسمانی فٹنس، جدت اور میدانِ جنگ میں پیشہ ورانہ مہارت کے اعلیٰ معیار کو برقرار رکھنے کی ہدایت کی۔
انہوں نے پاکستان کی مسلح افواج کی قومی خودمختاری اور علاقائی سالمیت کے دفاع کے عزم کا اعادہ کرتے ہوئے کہا کہ افواج پاکستان کنونشنل، سب کنونشنل، ہائبرڈ اور غیر متناسب چیلنجز سے نمٹنے کی بھرپور صلاحیت رکھتی ہیں۔
