ڈھاکا: جنوبی ایشیا کے دو روایتی حریف ممالک، پاکستان اور بھارت کے درمیان جاری شدید سفارتی اور فوجی تناؤ کے ماحول میں ایک حیران کن پیشرفت سامنے آئی ہے۔ بنگلادیش کی سابق وزیراعظم خالدہ ضیا کی آخری رسومات کے موقع پر بھارتی وزیر خارجہ ایس جے شنکر اور پاکستان کی قومی اسمبلی کے اسپیکر سردار ایاز صادق کے درمیان غیر رسمی ملاقات اور مصافحہ ہوا ہے۔
عینی شاہدین اور ذرائع کے مطابق، یہ ملاقات اس وقت ہوئی جب دونوں رہنما جنازے میں شرکت کے لیے موجود تھے۔ بھارتی وزیر خارجہ جے شنکر خود چل کر سردار ایاز صادق کے پاس آئے، جہاں دونوں رہنماؤں نے گرمجوشی سے مصافحہ کیا اور مختصر دورانیے کے لیے خوشگوار جملوں کا تبادلہ بھی کیا۔
سفارتی ماہرین اس ملاقات کو انتہائی اہمیت کا حامل قرار دے رہے ہیں، کیونکہ رواں برس مئی میں دونوں ممالک کے درمیان ہونے والی مختصر جنگ اور اس کے بعد پیدا ہونے والی شدید کشیدگی کے بعد یہ اعلیٰ سطح پر پہلا براہِ راست رابطہ ہے۔ اگرچہ دونوں ممالک کے درمیان باقاعدہ مذاکرات کا عمل معطل ہے، تاہم اس غیر متوقع مصافحے کو بین الاقوامی میڈیا میں "برف پگھلنے” کی ایک ابتدائی اور علامتی کوشش کے طور پر دیکھا جا رہا ہے۔
اس ملاقات نے ایک ایسے وقت میں دنیا کی توجہ حاصل کی ہے جب خطے میں امن و استحکام کے لیے عالمی طاقتیں دونوں ممالک کو مذاکرات کی میز پر لانے کی کوششیں کر رہی ہیں۔ تاحال دونوں ممالک کے وزرائے خارجہ یا حکومتوں کی جانب سے اس ملاقات پر کوئی باضابطہ تبصرہ سامنے نہیں آیا۔
