پی ایس ایل کی دو نئی ٹیموں کی بڈنگ جیتنے والی فرمز کے نمائندگان کی وزیراعظم سے ملاقات

اسلام آباد (): وزیراعظم محمد شہباز شریف سے پاکستان سپر لیگ (پی ایس ایل) میں دو نئی ٹیموں کی بڈنگ جیتنے والی فرمز کے نمائندگان نے ملاقات کی۔ ملاقات میں ٹیم سیالکوٹ حاصل کرنے والی فرم "او-زیڈ ڈویلپر” کے حمزہ مجید اور ٹیم حیدرآباد حاصل کرنے والی فرم "ایف کے ایس” کے فواد سرور شریک تھے۔
وزیراعظم نے ٹیم سیالکوٹ اور ٹیم حیدرآباد کے نمائندگان کو کامیاب بڈنگ پر مبارکباد دیتے ہوئے ان کے لیے نیک تمناؤں کا اظہار کیا۔ وزیراعظم نے کہا کہ پی ایس ایل پاکستان کا ایک کامیاب برانڈ بن چکا ہے اور نئی ٹیموں کی شمولیت سے لیگ مزید مضبوط ہوگی۔
وزیراعظم محمد شہباز شریف نے پاکستان سپر لیگ کی نئی ٹیموں کے لیے بڈنگ کے شفاف اور کامیاب انعقاد پر چیئرمین پاکستان کرکٹ بورڈ سید محسن رضا نقوی اور پی سی بی مینجمنٹ کو خراجِ تحسین پیش کیا۔ انہوں نے کہا کہ بڈنگ کا عمل براہِ راست ٹیلی ویژن پر نشر کیا گیا جو اس کی شفافیت کا منہ بولتا ثبوت ہے۔
وزیراعظم کا کہنا تھا کہ دو نئی ٹیموں کی شمولیت سے گراس روٹ کی سطح پر کرکٹ کے فروغ میں مدد ملے گی اور نئے ٹیلنٹ کو آگے آنے کے مواقع فراہم ہوں گے۔ انہوں نے کہا کہ یہ دونوں نئی ٹیمیں پی ایس ایل کے لیے تازہ ہوا کے جھونکے ثابت ہوں گی۔
وزیراعظم نے اس امر کو خوش آئند قرار دیا کہ نئی ٹیموں کی بڈنگ میں ملکی اور بین الاقوامی فرمز نے بھرپور دلچسپی کا مظاہرہ کیا، جس سے پاکستان میں بیرونی سرمایہ کاری کے فروغ میں مدد ملی۔ انہوں نے کہا کہ سمندر پار پاکستانی ہمیشہ سے ملکی ترقی میں اہم کردار ادا کرتے آئے ہیں۔
وزیراعظم نے مزید کہا کہ پی ایس ایل کی نئی ٹیموں کی بڈنگ کے عمل میں ملکی و بین الاقوامی سطح پر دلچسپی اس لیگ کی عالمی مقبولیت کا واضح ثبوت ہے۔
ملاقات میں وفاقی وزیر داخلہ محسن نقوی اور وفاقی وزیر اطلاعات و نشریات عطا اللہ تارڑ بھی موجود تھے۔